ខេត្ដស្វាយរៀង៖ មានករណីគ្រោះថ្នាក់ចរាចរណ៍មួយបានកើតឡើងរវាង រថយន្ដ និង រថយន្ដ លើកំណាត់ផ្លូវជាតិលេខ០១ ត្រង់ចំណុចគីឡូម៉ែតលេខ១២៦/១២៧ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្ដស្វាយរៀង បណ្ដាលឲ្យមនុស្សប្រុសស្រី៤នាក់ស្លាប់និងម្នាក់ទៀតរងរបួសធ្ងន់។
ហេតុការណ៍នេះ បានកើតឡើងនៅថ្ងៃ សៅរ៍ ០២ រោច ខែ ផល្គុន ឆ្នាំ ឆ្លូវ ត្រីស័ក ព.ស ២៥៦៥ ត្រូវនិងថ្ងៃទី ១៩ ខែ មីនា ឆ្នាំ ២០២២ វេលាម៉ោង ០៤និង១០ នាទីទៀបភ្លឺ ។
ប្រភពពីសមត្ថកិច្ចបានឲ្យដឹងថា មុនពេលកើតហេតុមានរថយន្ដបែនម៉ាក្ស SCANIA ពណ៏ ស ពាក់ស្លាកលេខ កំពង់ចាម 3B – 0332 បើកបរដោយឈ្មោះ យឿន ភារម្យ ភេទ ប្រុស អាយុ ៣០ ឆ្នាំ មុខរបរ បើកបរ រស់នៅភូមិ តាជោរ ឃុំ សង្កែ ស្រុក រំដួល ខេត្ត ស្វាយរៀង បើកបរពីជើងទៅត្បូង លុះមកដល់ចំណុចកើតហេតុបានបុកពេញទំហុឹងជាមួយរថយន្ដម៉ាក្ស ហាយឡែនឌ័រ ពណ៍ សំបកឪឡឹកពាក់ស្លាកលេខ ភ្នំពេញ 2BD-1141 បើកបរពីកើតទៅលិច បើកបរដោយឈ្មោះ ហឹម ដានី ភេទ ប្រុស អាយុ ៣៤ ឆ្នាំ មុខរបរ រត់តាក់សុី រស់នៅភូមិ គោកល្វាង សង្កត់ ព្រៃអង្គុញ ក្រុង បាវិត ខេត្ត ស្វាយរៀង បណ្ដាលឲ្យអ្នកបើកបររងរបួសធ្ងន់ ចំណែកឯរថយន្ដទាំងពីររងខូចខាតយ៉ាងដំណំ ។
ប្រភពដដែលបានបន្ដថា ក្នុងរថយន្ដម៉ាក្ស ហាយឡែនឌ័រពណ៍សំបកឪឡឹក ពាក់ស្លាកលេខ ភ្នំពេញ 2BD-1141មានអ្នករួមដំណើរចំនួន៤នាក់ បានបាត់បង់ជីវិតទាំងអស់។
ជនរងគ្រោះទាំង៤នាក់រួមមានឈ្មោះ ៖
ទី១. ស៊ុន ស្រីណង ភេទ ស្រី អាយុ ៤៤ ឆ្នាំ មុខរបរ លក់ដូរ រស់នៅភូមិ ជ្រៃធំ សង្កាត់ ព្រៃអង្គុញ ក្រុង បាវិត ខេត្ត ស្វាយរៀង ( ស្លាប់ )។
ទី២. ពេជ្រ ដាំ ភេទ ប្រុស អាយុ ៤៨ មុខរបរ លក់ដូរ រស់នៅភូមិ ជ្រៃធំ សង្កាត់ ព្រៃអង្គុញ ក្រុង បាវិត ខេត្ត ស្វាយរៀង ( ស្លាប់ )។
ទី៣. ទីវ ឡន ភេទ ស្រី អាយុ ៣២ ឆ្នាំ មុខរបរ កម្មកររោងចក្រ រស់នៅភូមិ ដើមពោធិ៍ ឃុំ ស្វាយតាយាន ស្រុក កំពង់រោទិ៍ ខេត្ត ស្វយរៀង ( ស្លាប់ )។
ទី៤. លុន រតនា ភេទ ប្រុស អាយុ ០៨ ឆ្នាំ មុខរបរ សិស្ស រស់នៅភូមិ ដើមពោធិ៍ ឃុំ ស្វាយតាយាន ស្រុក កំពង់រោទិ៍ ខេត្ត ស្វាយរៀង ( ស្លាប់ ) ។
ក្រោយពីសមត្ថកិច្ចវាស់វែងរួច ក៍បានប្រគល់សពអោយក្រុមគ្រួសារ យកទៅធ្វើបុណ្យតាមប្រពៃណី និងអ្នករបួសសម្រាកព្យាបាលនៅមន្ទីរពេទ្យខេត្តស្វាយរៀង ចំណែកឯ មធ្យោបាយរក្សាទុកនៅការិយាល័យចរាចរណ៍ខេត្តស្វាយរៀង រង់ចាំដោះស្រាយគ្នានៅពេលក្រោយ៕
