ធ្លាយហ្គាសបង្ក ជាអគ្គិភ័យឆាបឆេះ សិប្បកម្មកាត់ដេរខោអាវ មួយកន្លែង នៅខណ្ឌពោធិ៍សែនជ័យ
ភ្នំពេញ ៖ អគ្គិភ័យមួយបានឆាបឆេះសិប្បកម្មកាត់ដេរខោអាវមួយកន្លែង ដោយសារតែការធ្លាយហ្គាសបង្ករជាអគ្គិភ័យ ក្នុងនោះបានបំផ្លាញសម្ភារៈអស់មួយចំនួនផងដែរ។
ហេតុការណ៍នេះ បានកើតឡើងនៅវេលាម៉ោង ៧និង៣០នាទីព្រឹក ថ្ងៃទី១២ ខែមីនា ឆ្នាំ២០២២ ដែលស្ថិតនៅចំណុចសិប្បកម្មកាត់ដេរខោអាវ ក្នុងភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យ ប្រាប់ឲ្យដឹងថា ក្រោយពីទទួលបានព័ត៌មានពីប្រជាពលរដ្ឋមកថា មានអគ្គិភ័យកំពុងឆាបឆេះសិប្បកម្មកាត់ដេរខោអាវ ភ្លាមៗនោះ លោកក៏បានបញ្ជាទៅកម្លាំងសមត្ថកិច្ចជំនាញពន្លត់អគ្គិភ័យដែលប្រចាំការនៅទីតាំងសាលាខណ្ឌពោធិ៍សែនជ័យ ដើម្បីចេញរថយន្តពន្លត់អគ្គិភ័យជួយអន្តរាគមន៍។
ដោយនៅក្នុងនោះ លោកវរសេនីយ៍ឯក ព្រហ្ម យ៉ន ក៏បានបញ្ជាទៅគោលដៅប្រចាំការនៅសាលាខណ្ឌសែនសុខ ជួយចេញរថយន្តពន្លត់អគ្គិភ័យ ២គ្រឿងបន្ថែមទៀត ដើម្បីជាជំនួយជួយដល់ទីតាំងដែលកំពុងតែឆាបឆេះនេះ។
លោកវរសេនីយ៍ឯក ក៏បានបន្តថា ដោយនៅក្នុងរង្វង់ប្រតិបត្តិការអន្តរាគមន៍ជួយសង្គ្រោះនេះ គឺកម្លាំងជំនាញរបស់យើង បានប្រើប្រាស់រថយន្តពន្លត់អគ្គិភ័យរបស់ការិយាល័យ ចំនួន ៣គ្រឿង ប្រើប្រាស់ទឹកអស់ ៣ឡាន ស្មើនឹង ១២ម៉ែត្រគូប ទើបរលត់ទាំងស្រុង។
លោកវរសេនីយ៍ឯក បានបញ្ជាក់ថា ចំពោះអគ្គិភ័យខាងលើនេះ បានឆេះបំផ្លាញ ថ្មប្រក់សង្ក័សី ដែលមានទំហំ ៦ម៉ែត្រ x ១៦ម៉ែត្រ និងបណ្តាលឲ្យឆេះខូចខាតសម្ភារៈ រួមមាន ៖ ម៉ាស៊ីនដេរចំនួន ១០គ្រឿង, ទូរទស្សន៍ ១គ្រឿង, ទូរទឹកកក ១គ្រឿង, ធុងហ្គាស ១ធុង, ក្រណាត់មួយចំនួន និងពុំបណ្តាលឲ្យឆេះរាលដាលដល់ផ្ទះអ្នកជិតខាងឡើយ។
យ៉ាងណាមិញ សម្រាប់ប្រតិបត្តិការនេះ គឺសមត្ថកិច្ចជំនាញរបស់យើង បានធ្វើការគ្រងគ្រងបាននៅវេលាម៉ោង ៨និង០០នាទីព្រឹកថ្ងៃដដែរ។
សម្រាប់គ្រោះអគ្គិភ័យខាងលើនេះ គឺមិនបានបណ្តាលឲ្យអ្នកម្នាក់រងគ្រោះឡើយ៕
