សង្ស័យ លួចបង្កប់សេវាកម្មបម្រើផ្លូវភេទ អភិបាលខណ្ឌពោធិ៍សែនជ័យ ដឹកនាំកម្លាំងចំរុះចុះទៅទាំងថ្ងៃ!

ភ្នំពេញ៖ លោក ហែម ដារិទ្ធិ អភិបាលខណ្ឌពោធិ៍សែនជ័យ ដឹកនាំកម្លាំងគណៈបញ្ជាការឯកភាពខណ្ឌបានចុះត្រួតពិនិត្យទីតាំង អាជីវកម្ម ម៉ាស្សា យីហោ «ជីនលីហ័រ» ដោយសង្ស័យថា ទីតាំងនេះ មានបង្កប់សេវាកម្មបម្រើផ្លូវភេទ ស្ថិតនៅតាមបណ្តោយផ្លូវសហព័ន្ធរុស្ស៊ី សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ និង ផ្ទះសំណាក់ យីហោ DEFFUSE TIME HOTEL ដែលមានទីតាំងតាមបណ្តោយ ផ្លូវ១១១ ស្ថិតក្នុង ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ នារសៀលថ្ងៃទី១០ ខែមីនា ឆ្នាំ២០២២នេះ។

ប្រតិបត្តិការនេះ មានការចូលរួមពីសំណាក់ លោកអភិបាលរង មន្ត្រីជំនាញ លោកអធិការរង នាយប៉ុស្តិ៍ និង កម្លាំងពាក់ព័ន្ធ ច្រើនរូបទៀត។

លោក ហែម ដារិទ្ធិ អភិបាលខណ្ឌ និងជាប្រធានគណៈបញ្ជាការឯកភាពខណ្ឌពោធិ៍សែនជ័យ បានប្រាប់បណ្ដាញព័ត៌មានយើងឲ្យដឹងថា ក្រោយទទួលបាន ព័ត៌មាន លើបណ្តាញសង្គមហ្វេសប៊ុក លោក បានដឹកនាំកម្លាំងជំនាញ ក្រោមការសម្របសម្រួលពីតំណាងអយ្យការសាលាដំបូងរាជធានីភ្នំពេញ បានចុះពិនិត្យស្ថានភាពជាក់ស្ដែង ទីតាំងអាជីវកម្ម ម៉ាស្សា យីហោ «ជីនលីហ័រ» ជាលទ្ធផល ពិនិត្យឃើញថា គឺផុតសុពលភាពច្បាប់អនុញ្ញាតធ្វើអាជីវកម្ម តែរកមិនឃើញវត្ថុតាងពាក់ព័ន្ធនឹងការជួញដូរផ្លូវភេទ នោះទេ។ ដោយឡែក ផ្ទះសំណាក់ យីហោ DEFFUSE TIME HOTEL ក៍ផុតសុពលភាពច្បាប់ អនុញ្ញាត ធ្វើអាជីវកម្មដែរ ក្នុងការត្រួតពិនិត្យឆែកឆេរតាមបន្ទប់ រកឃើញ ឧបករណ៍ ពាក់ព័ន្ធនឹង ល្បែងស៊ីសង ហើយ ត្រូវបានរឹបអូសយកមករក្សាទុកនៅសាលាខណ្ឌ។

លោកអភិបាលខណ្ឌពោធិ៍សែនជ័យ បញ្ជាក់បន្ថែមថា ដោយមានការឯកភាពពីតំណាងអយ្យការសាលាដំបូងរាជធានីភ្នំពេញ ក្នុងនាមអាជ្ញាធរខណ្ឌ បានសម្រេចបិទអាជីវកម្ម ទាំង២ទីតាំងខាងលើ ជាបណ្ដោះអាសន្នសិន។

សូមជម្រាបថា ការចុះពិនិត្យ និងផ្អាកអាជីវកម្ម ម៉ាស្សា យីហោ «ជីនលីហ័រ» និង ផ្ទះសំណាក់ យីហោ DEFFUSE TIME HOTEL ក្រោយឃើញ វីដេអូ ដែលគេចែកចាយតាមបណ្ដាញសង្គម Facebook ហើយត្រូវបានគេសង្ស័យថា ទីតាំងទាំងនេះ មានបង្កប់សេវាបម្រើផ្លូវភេទ៕