បាត់ដំបង៖ គ្រាប់មីនបន្សល់ទុកក្នុងដីកាលពី សម័យសង្គ្រាម ក្នុងស្រុកគាស់ក្រឡ ដែលជាតំបន់ក្តៅ ត្រូវបានប្រជាពលរដ្ឋម្នាក់ដើរខ្វាលគោ លុះល្ងាចឡើងដេញគោត្រឡប់ទៅផ្ទះវិញ ស្រាប់តែជាន់មីនបណ្តាលអោយផ្ទុះស្លាប់ម្ចាស់គោម្នាក់និងងាប់សត្វគោ១ក្បាល ក្នុងថ្លុកឈាម។
ហេតុការណ៍នេះបានកើតឡើងកាលពីវេលាម៉ោង៤និង៤០នាទីល្ងាច ថ្ងៃទី៨ ខែមិនា ឆ្នាំ២០២២ នៅភូមិព្រៃទទឹង ឃុំឆ្នាលមាន់ ស្រុកគាស់ក្រឡ ខេត្តបាត់ដំបង។
ក្មេងប្រុសរងគ្រោះឈ្មោះ សឿន រ៉ាន់សុីង ភេទប្រុស អាយុ១៣ឆ្នាំ មានទីលំនៅ ក្នុងភូមិ ឃុំ ស្រុក កើតហេតុខាងលើ។
ក្រោយពេលកើតហេតុភ្លាមៗនោះកម្លាំងនគរបាលជំនាញនៃអធិការដ្ឋាននគរបាលស្រុកគាស់ក្រឡ បានចុះទៅដល់ទីតាំងកើតហេតុ ដើម្បីពិនិត្យសព ក្នុងស្ថានភាពស្តែង។
ក្រោយពេលសមត្ថកិច្ចជំនាញពិនិត្យនិងធ្វើកំណត់ហេតុរួចរាល់ ក៍ប្រគល់ សព ក្មេងប្រុសរងគ្រោះអោយក្រុមគ្រួសារយកទៅរៀបចំធ្វើបុណ្យតាមប្រពៃណី៕
ដោយ ៖ សុខ កុសល
