ជិះម៉ូតូកាន់ដាវ និងកាំបិតផ្គាក់ មកស្រាយគំនុំចាស់ មិនជួប! ត្រូវពលរដ្ឋ ជួយចាប់ ប្រគល់អោយ ប៉ូលិស!

ភ្នំពេញ៖ សមត្ថកិច្ច បញ្ជាក់ថា កាលពីថ្ងៃទី ២០ ខែ កុម្ភៈ ឆ្នាំ ២០២២ វេលាម៉ោង ១៩ និង ៣០នាទី ជនសង្ស័យ ឈ្មោះ មុត មុន្នីជាតិ ភេទ ប្រុស អាយុ ១៨ ឆ្នាំ និងបក្ខពួកចំនួន៦នាក់ទៀត មិនស្គាល់ ឈ្មោះបានជិះម៉ូតូចំនួន៣ គ្រឿង ១គ្រឿងម៉ាក ហុងដាស្គុបពី (មិនចាំស្លាកលេខ) និងម៉ូតូ ២គ្រឿងទៀតមិនស្គាល់ម៉ាក ប្រដាប់ដោយដាវ ២ដើម និងកាំបិតផ្គាក់ ១ដើម បាននាំគ្នាជិះម៉ូតូដល់ចំណុចបណ្តោយផ្លូវលំ ភូមិដំណាក់ធំ១ សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ (កន្លែងកើតហេតុ) ក្នុងគោលបំណងមករក ឈ្មោះ ក្តី ភេទ ប្រុស អាយុប្រហែល ២០ ឆ្នាំ (ដែលធ្លាប់មានទំនាស់ជាមួយបក្ខពួកជនសង្ស័យ) ប៉ុន្តែមិនជួប ឃើញដូចនោះ ឈ្មោះ ណៃ ផាន់ណេង ភេទ ប្រុស អាយុ ៣២ឆ្នាំ និងប្រជាពលរដ្ឋនាំគ្នាស្ទាក់ចាប់ឃាត់ខ្លួន បានជនសង្ស័យម្នាក់ ឈ្មោះ មុត មុន្នីជាតិ យកមកប្រគល់ឲ្យសមត្ថកិច្ចប៉ុស្តិ៍នគរបាលស្ទឹងមានជ័យទី២ ធ្វើការសាកសួរតែម្តង ចំណែកបក្ខពួកជនសង្ស័យ ចំនួន៦នាក់ទៀតមិនស្គាល់អត្តសញ្ញាណបានជិះម៉ូតូរត់គេចខ្លួនបាត់អស់ ដោយបន្សល់ទុកនៅដាវចំនួន២ដើម និងកាំបិតផ្គាក់១ដើមនៅកន្លែងកើតហេតុ ។

ជនសង្ស័យឈ្មោះ មុត មុន្នីជាតិ ភេទ ប្រុស អាយុ ១៨ឆ្នាំ ស្នាក់នៅផ្ទះគ្មានលេខ ផ្លូវលំ ភូមិ អន្លង់គងថ្មី សង្កាត់ព្រៃសរ ខណ្ឌដង្កោ រាជធានីភ្នំពេញ មុខរបរ មិនពិតប្រាកដ ។ (គ្មានផ្ទុះសារធាតុញៀន)

វត្ថុតាងចាប់យក : ដាវចំនួន ២ដើម និងកាំបិតផ្គាក់ ១ដើម ។

បច្ចុប្បន្នជនសង្ស័យចំនួន ឈ្មោះ មុត មុន្នីជាតិ ឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ។