សង្ឃឹមថា វស្សានេះ មិនជន់លិចខ្លាំង ដូចរាល់ឆ្នាំ! គម្រោងការពារជំនន់ទឹកស្ទឹងព្រែកត្នោត អនុវត្តបាន ៣០ភាគរយហើយ!
ភ្នំពេញ៖ គម្រោងប្រព័ន្ធស្រោចស្រព និងការពារជំនន់ ទឹកស្ទឹងព្រែកត្នោត សម្រាប់រាជធានីភ្នំពេញ និងខេត្តកណ្តាល ដែលជាគម្រោងរបស់ក្រសួងធនធានទឹក អនុវត្តដោយក្រុមហ៊ុន GDFC ប្រើប្រាស់កញ្ចប់ថវិកាជំនួយហិរញ្ញប្បទាន បានមកពីសាធារណរដ្ឋប្រជាមានិតចិន គិតត្រឹមថ្ងៃទី២០កុម្ភៈ ឆ្នាំ២០២២ អនុវត្តបានលទ្ធផលប្រមាណជា៣០ភាគរយ នៃគម្រោងហើយនៅលើការដ្ឋានផ្សេងៗគ្នា ជាច្រើនគោលដៅ បន្ទាប់ពីបាន ចាប់ផ្តើមអនុវត្តកាលពីថ្ងៃទី០១ ខែធ្នូ ឆ្នាំ២០២១ កន្លងទៅនេះ ។
តាមការអោយដឹង ពីមន្ត្រីជំនាញបច្ចេកទេស ក្រសួងធនធានទឹក បញ្ជាក់ ថា៖ គម្រោងប្រព័ន្ធស្រោចស្រព និងការពារទឹកជំនន់ ស្ទឹងព្រែកត្នោត មានគោលបំណងសំខាន់ ក្នុងការទាញយកទឹកស្ទឹងព្រែកត្នោត សម្រាប់ស្រោចស្រពដីស្រែប្រាំង ចំនួន១០.១៥០ហិកតា និងស្រូវវស្សា១៧.៧៣០ហិកតា។
ជាពិសេសជាងនេះទៀត គឺការពារជំនន់ទឹកស្ទឹងព្រែកត្នោត ដែលតែងតែគំរាមកំហែងដល់ រាជធានីភ្នំពេញ និងខេត្តកណ្តាល ជារៀងរាល់ឆ្នាំនៅក្នុងរដូវវស្សា។
គួរបញ្ជាក់ថា៖ តាមពិតគម្រោងនេះត្រូវអនុវត្តតាំងពីដើមឆ្នាំ២០២១ តែដោយសារវិប្បត្តិកូវីដ ១៩ ទើបធ្វើឱ្យមានការពន្យាពេលរហូតមក ដល់ចុងឆ្នាំទើបបានចាប់ផ្តើមអនុវត្ត៕
ប្រភព ៖ ព័ត៌មានខេត្តកណ្តាល
