ឃាត់ជនជាតិឡាវម្នាក់ និងថ្នាំញៀន ១០កញ្ទប់ធំ នៅចំណុច ស្ពានទី២ ច្រករបៀង ក្នុងស្រុកបុរីអូរស្វាយសែនជ័យ!

ខេត្តស្ទឹងត្រែង៖ កម្លាំងមន្ទីរប្រឆាំងបទល្មើសគ្រឿងញៀន ការិយាល័យ ក9 នៃក្រសួងមហាផ្ទៃ ដឹកនាំដោយ លោកឧត្តមសេនីយ៍ត្រី យិន បញ្ញារិទ្ធនាយករង ក្រោមការ សម្របសម្រួលលោក ស៊ីន រក្សា ព្រះរាជអាជ្ញារង អមសាលាដំបូងខេត្តស្ទឹងត្រែង សហការជាមួយកម្លាំងនគរបាលការិយាល័យជំនាញ របស់ស្នងការនគរបាល ខេត្តស្ទឹងត្រែង កម្លាំង BLO កម្លាំងអន្តោប្រវេសន៍ច្រកត្រពាំងគ្រៀល កម្លាំងវរសេនាតូចនគរបាលការពារព្រំដែន គោកលេខ ៧០១ បានបង្ក្រាប និងឃាត់ខ្លួនជនសង្ស័យ ជនជាតិឡាវម្នាក់ រឹបអូស វត្ថុតាង គ្រឿងញៀន បានចំនួន ១០ដុំ កាលពីវេលាម៉ោង ៩ និង៣០នាទីថ្ងៃទី១៣កុម្ភៈ ២០២២។

លោកឧត្តមសេនីយ៍ត្រី យិន បញ្ញារិទ្ធ បញ្ជាក់ថា ប្រតិបត្តិការណ៍បង្ក្រាបខាងលើ ស្ថិតនៅចំណុច ស្ពានទី២ ច្រករបៀង ស្ថិតក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។

ក្នុងនោះឃាត់ខ្លួនជនសង្ស័យម្នាក់ ឈ្មោះ ភីម ម៉ាន់ចាន់កាន់ ភេទប្រុស អាយុ២៤ឆ្នាំ ជនជាតិ ឡាវ។
វត្ថតាងចាប់យក ៖ មេតំហ្វេតាមីន (ICE)១០ កញ្ទប់ធំ ទម្ងន់ ៩.៨៦៦.៥៦ ក្រាម ។

បច្ចុប្បន្នវត្ថុតាង និងជនសង្ស័យ ត្រូវបានសមត្ថកិច្ច នាំមកកាន់ ស្នងការនគរបាលខេត្តស្ទឹងត្រែង និង កំពុងរៀបចំកសាងសំណុំរឿង បញ្ជូនទៅកាន់តុលាការ ដើម្បីចាត់ការតាមនីតិវិធី៕ ដោយ៖ អ៊ុល គឹមលាង