ខេត្តកោះកុង៖ សមត្ថកិច្ចខេត្តកោះកុង បានអោយដឹងថា មនុស្សម្នាក់ស្លាប់ ខណៈម្នាក់ទៀត របួសធ្ងន់ដោយគ្រោះថ្នាក់ចរាចរណ៍ រវាងម៉ូតូ និងរថយន្តកាលពី ថ្ងៃទី១៧ ខែមករាឆ្នាំ២០២២ វេលាម៉ោង ១៤និង៥០ នាទី រវាងម៉ូតូ និងរថយន្តដឹកទំនិញ (បញ្ច្រាសទិសគ្នា) នៅចំណុ សាលាឆទាន ផ្លូវជាតិលេខ៤ ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល។
សមត្ថកិច្ច អោយដឹងថា ម៉ូតូ ម៉ាកហុងដា C125 ពណ៌ខ្មៅ (គ្មាន ស្លាកលេខ) បើកបរ ដោយ ឈ្មោះ ណុច ឧត្តម (ពាក់មួក និងម៉ូតូមានកញ្ចក់មើលក្រោយ) ភេទប្រុស អាយុ២២ ឆ្នាំ មុខរបរ កម្មករ (ស្លាប់) និងអ្នករួមដំណើរ ត្រូវជាបងស្រី ឈ្មោះ ណុច សុកណា (ពាក់កមួកសុវត្ថិភាព) អាយុ២៨ឆ្នាំមុខរបរ កម្មករ អ្នកទាំងពីរនាក់ មានទីលំនៅភូមិតាហែន២ ឃុំរការ ស្រុកសង្កែខេត្តបាត់ដំបង បើកបរទិសដៅ ពីកើតទៅលិច លុះមកដល់ចំណុចកើតហេតុ បានបុកជាមួយ និងរថយន្តដឹកទំនិញ ចំពីចំហៀងខាងឆ្វេង បណ្ដាលឲ្យដួលបោកទៅនិងចិញ្ចើមផ្លូវខាងស្ដាំស្លាប់ម្នាក់របួសធ្ងន់ម្នាក់ នៅនឹងកន្លែងកើតហេតុ។
រថយន្តបង្កម៉ាក IZUZU ពណ៌ក្រហម ពាក់ស្លាក លេខ ន ប 0080 បានបើកបរ ដោយ ឈ្មោះ សុខ វ៉ាន់នី ភេទប្រុស អាយុ ៣៣ឆ្នាំ មុខរបរ បើកបរ រថយន្ត មានទីលំនៅភូមិកូវ ឃុំក្រែក ស្រុកពញ្ញាក្រែក ខេត្តត្បូងឃ្មុំ និងអ្នករួមដំណើរ ឈ្មោះ ស៊ន សុហេង ភេទប្រុស អាយុ ៥៤ឆ្នាំ មានទីលំនៅ ភូមិ៥ សង្កាត់អូរឬស្សី2 ខ័ណ្ឌ៧មករា រាជធានីភ្នំពេញ (អ្នកទាំង២ មិនមានរងរបួសទេ)។
សមត្ថកិច្ច បញ្ជាក់ថា មូលហេតុ គឺបណ្តាលមកពី អ្នកបើកបរ រថយន្តដឹកទំនិញ ប្រើប្រាស់ល្បឿនលឿនមិនប្រកាន់ស្ដាំ។ ហើយត្រូវកម្លាំងជំនាញ ធ្វើការឃាត់ខ្លួននៅអធិការដ្ឋាននគរបាលស្រុកស្រែអំបិល។
ចំណែកឯជនរងគ្រោះ អ្នកបើកបរម៉ូតូ (ស្លាប់) ផ្នែកជំនាញ បានតម្កល់ នៅវត្តសាលាម្នាង រង់ចាំសាច់ញាតិមកទទួលយកទៅធ្វើរបុណ្យតាមប្រពៃណី ចំណែកអ្នករងរបួសធ្ងន់ ត្រូវជាបងស្រី ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកស្រែអំបិល។
រីឯវត្ថុតាងម៉ូតូ នឹងរថយន្តផ្នែកជំនាញបានយកមករក្សាទុកនៅអធិការដ្ឋាននគរបាលស្រុកស្រែអំបិល រងចាំការដោះស្រាយតាមនិតិវិធី។
