ខេត្តស្វាយរៀង ៖ ករណីបុរសម្នាក់បានស្លាប់ភ្លាមៗនៅនិងកន្លែងកើតហេតុ ខណៈបើកបរម៉ូតូធំលឿនដូចហោះ បណ្តាលដួលបោកក្បាលចូលម៉ូតូមួយគ្រឿងស្លាប់ភ្លាមៗនៅនិងកន្លែងកើតហេតុ និងម្នាក់រងរបួសស្រាល។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១៧:៥៨នាទី ថ្ងៃទី១៣ ខែមករា ឆ្នាំ ២០២២ លើផ្លូវលេខ៣១៤ ស្ថិតក្នុងភូមិថ្មី សង្កាត់សង្ឃ័រ ក្រុងស្វាយរៀង ។
យោងតាមសមត្ថកិច្ចបានឲ្យដឹងថា៖ នៅមុនពេលកើតហេតុមានម៉ូតូមួយគ្រឿងម៉ាក ហុងដាម៉ាក CB ពណ៏ខ្មៅ ពាក់ផ្លាក់លេខ ភ្នំពេញ១JC -៣៥៥០ បើកបរដោយឈ្មោះ តូច វាសនា ភេទ ប្រុស អាយុ៣០ឆ្នាំ មុខរបរយោធា រស់នៅភូមិ វាលយន្ដ ក្រុងស្វាយរៀង បើកបរពីលិចទៅកើត មិនពាក់មួកសុវត្ថិភាព ។
ប្រភពបានបន្តទៀតថា៖ លុះមកដល់ចំណុចកើតហេុខាងលើក៏បុកទួលថ្នល់ទើបតែអ៊ុត ដួលបោកអូសមនុស្សខ្ទាតចូលម៉ូតូមួយគ្រឿងទៀតម៉ាកLet’s ពណ៏ ស ពាក់ផ្លាកលេខ ភ្នំពេញ ១DD-៨៥៩២ បើកបរដោយឈ្មោះ ថន ស្រីលក្ខណ៍ ភេទស្រី អាយុ២៧ឆ្នាំ មុខរបរ បុគ្គលិកអេសុីលីដា រស់នៅភូមិរោងបន្លែ ក្រុងស្វាយរៀង ដែលធ្វើដំណើរពីកើតទៅលិច (ពាក់មួកសុវត្ថិភាព) បណ្តាលឲ្យអ្នកបើកបរម៉ូតូធំស្លាប់ភ្លាមៗនៅកន្លែងកើតហេតុតែម្តង និងអ្នកបើកបរម៉ូតូម៉ាកLet’s ពណ៏ស រងរបួសស្រាល ម៉ូតូខូចខាតស្រាល ។
ក្រោយពីកើតហេតុភ្លាមៗ គេឃើញសមត្ថកិច្ចចុះមកដល់កន្លែងកើតហេតុដើម្បីធ្វើការវាស់វែងនិងសម្រួលចរាចរណ៍រីឯមធ្យោបាយទាំង២យកទៅរក្សាទុកនៅអធិការក្រុងស្វាយរៀង ដើម្បីធ្វើការដោះស្រាយគ្នានៅពេលក្រោយ និងអ្នករបួសសម្រាកព្យាបាលនៅមន្ទីរពេទ្យខេត្តស្វាយរៀង។
ចំពោះជនសពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី ៕ ដោយ: Win
