លោក ឌី រ័ត្នខេមរុណ ៖ រដ្ឋាភិបាលកម្ពុជា បានដាក់ចេញនូវវិធានការ ដ៏មានប្រសិទ្ធភាពនិងប្រយ័ត្នប្រយែង ..!

ភ្នំពេញ៖ នៅវេលាម៉ោង ៧ និង៣០ នាទីព្រឹក ថ្ងៃចន្ទ ៨កើត ខែបុស្ស ឆ្នាំឆ្លូវ ត្រីស័ក ព.ស ២៥៦៥ ត្រូវនិងថ្ងៃទី ១០ ខែ មករា ឆ្នាំ ២០២២ លោក ឌី រ័ត្នខេមរុណ អភិបាលរង ខណ្ឌមានជ័យ បានអញ្ជើញជាអធិបតី អបអរសាទរ ក្នុងពិធីបើកបវេសនកាលថ្មី ឆ្នាំសិក្សា ២០២១-២០២២ នៅសាលាបឋមសិក្សាចំរើនផល ស្ថិតក្នុងភូមិចំរើនផល សង្កាត់បឹងទំពន់ទី១ ខណ្ឌមានជ័យ ។

ក្នុងនោះដែរ មានការចូលរួមពី ៖ លោកលោកស្រី នាយកសាលា នាយករង តំណាង សង្កាត់ ភូមិ លោកគ្រូ អ្នកគ្រូ តំណាងអង្គការ ចូលរួមក្នុងកម្មវិធីនេះផងដែរ ។

តាមរបាយការណ៍ របស់នាយក សាលា ក្នុងឆ្នាំសិក្សាកន្លងមក ៖

អនុវិទ្យាល័យ ចំរើនផល មានមន្រ្តីសរុប ២៨ នាក់ ស្រី ១៦ នាក់ ក្នុងនោះមានគណៈគ្រប់គ្រងចំនួន ០២ នាក់ មាន សិស្សានុសិស្ស ចំនួន ៣២៧ នាក់ ស្រី ១៥៦ នាក់ បែកចែកជា ៦ថ្នាក់ គឺទី៨ ចំនួន ០៣ ថ្នាក់ និងទី៧ ចំនួន ០៣ ថ្នាក់ ។

សាលាបឋមសិក្សា ចំរើនផល មានមន្ត្រីសរុប ៣៤ នាក់ ស្រី ៣០ នាក់ ក្នុងនោះមានគណៈគ្រប់គ្រងចំនួន ០២ នាក់ សិស្សានុសិស្សសរុប ១,២០១ នាក់ ស្រី ៥៧៨ នាក់ បែងចែកជា ២៨ ថ្នាក់ គឺ ៖
ទី៦ មាន០៤ ថ្នាក់ទី៥ មាន០៤ ថ្នាក់ ទី៤ មាន០៤ ថ្នាក់ ទី៣ មាន០៤ ថ្នាក់ ទី២ មាន ០៦ ថ្នាក់ ទី១ មាន០៦ថ្នាក់ ។

ក្នុងឱកាសនេះដែរ លោក ឌី រ័ត្នខេមរុណ អភិបាលរងខណ្ឌមានជ័យ ក៍បានពាំនាំនូវការផ្តាំផ្ញើរសួរសុខទុក្ខពីសំណាក់ សម្តេច អគ្គមហាសេនា បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផ្ញើជូនក្មួយៗសិស្សានុសិស្ស ក្នុងឱកាស បើកបវេសនកាលឆ្នាំសិក្សាថ្មីនាឆ្នាំ ២០២១-២០២២ និង សូមជូនពរ សាស្ត្រចារ្យ លោកគ្រូ អ្នកគ្រូ បុគ្គលិកអប់រំ កូនក្មួយ ចៅៗ សិស្សានុសិស្ស ទាំងអស់ ទទួលបានសុខភាពល្អ ជោគជ័យគ្រប់ភារកិច្ចការងារ និងការសិក្សាគ្រប់ៗគ្នា ក្នុងឱកាសឆ្នាំសិក្សាថ្មី ២០២១-២០២២ នេះ ទទួលបានលទ្ធផលល្អប្រសើគ្រប់ៗគ្នា ។

លោក ឌី រ័ត្នខេមរុណ អភិបាលរង ខណ្ឌមានជ័យ បន្តទៀតថា រដ្ឋាភិបាលកម្ពុជា បានដាក់ចេញនូវវិធានការដ៏មាន ប្រសិទ្ធភាពនិងប្រយ័ត្នប្រយែង ព្រមទាំងអាចកត់ត្រាទុកនិងរៀនសូត្រជា មេរៀនបទពិសោធ សម្រាប់ការអនុវត្ត “គន្លងប្រក្រតីភាពថ្មីនៃវិស័យអប់រំ” រួមមាន៖
១- ការយកចិត្តទុកដាក់ដល់អាយុជីវិតរបស់បុគ្គលិកអប់រំនិងសិស្សានុសិស្សជាកត្តាអាទិភាព ។
២- ការអនុវត្តយ៉ាងខ្ជាប់ខ្ជួននូវវិធានការសុវត្ថិភាព សុខភាពសម្រាប់បុគ្គលិកអប់រំនិងសិស្សានុសិស្ស នៅតាមគ្រឹះស្ថាន សិក្សាស្របតាមគោលការណ៍ “៣កុំ ៣ការពារ” តាមរយៈការអប់រំ ការផ្សព្វផ្សាយ និងការជួយគាំទ្រអំពីវិធានការការពារខ្លួនពីការឆ្លងកូវីដ-១៩ ។
៣- ការរៀបចំនិងកែលម្អហេដ្ឋា រចនាសម្ព័ន្ធ បរិក្ខារអនាម័យ បង្គន់អនាម័យ និងទឹកស្អាត នៅតាម គ្រឹះស្ថានសិក្សាឱ្យបានគ្រប់គ្រាន់ ។
៤- ការរៀបចំនិងអភិវឌ្ឍប្រព័ន្ធអប់រំតាមបែបអេឡិចត្រូនិក ការអប់រំបែបឌីជីថល និងការអប់រំពីចម្ងាយ ឱ្យសម្បូរបែប និងចែកផ្សាយឱ្យបានទូលំទូលាយ ។
៥- ការអនុញ្ញាតឱ្យដំណើរការគ្រឹះស្ថានសិក្សាឡើងវិញតាមបណ្តុំ តាមដំណាក់កាល និងប្រកបដោយភាពប្រុងប្រយ័ត្ន ។
៦- ការអនុវត្តវិធានការគ្រប់គ្រងនិងរដ្ឋបាលតាមប្រព័ន្ធឌីជីថល ដែលមានប្រសិទ្ធភាព និង ។
៧- ការចាក់វ៉ាក់សាំងការពារកូវីដ-១៩ ជូនបុគ្គលិកអប់រំនិងសិស្សានុសិស្សឱ្យបានគ្រប់គ្នា។

ជាចុងក្រោយ លោក ឌី រ័ត្នខេមរុណ អភិបាលរង ខណ្ឌមានជ័យ បានឧបត្ថម្ភ ថវិកា ចំនួន ៥០ម៉ឺន រៀល ជូននាយកសាលា សំរាប់ទ្រទ្រង់ និងជួសជុស កែលំអរអាគារសិក្សា ដើម្បីលើកស្ទួយ សោភ័ណភាព សាលាផងដែរ ។