កំពង់ស្ពឺ ៖ យោងតាមផេក ស្នងការដ្ឋាននគរបាលខេត្តកំពង់ស្ពឺ បានបញ្ជាក់ថា នៅយប់ ៤ មករា ២០២២ វេលាម៉ោង ២០ និង២០នាទី នៅលើផ្លូវលេខ ១០៥ ចំណុចរង្វង់មូលផ្លែស្ពឺ ភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន មានករណី រថយន្ត ១គ្រឿង ម៉ាក Tacoma ពាក់ផ្លាកលេខ ភ្នំពេញ 2BA-1655 បើកបរដោយឈ្មោះ ហេង គៀត ភេទប្រុស អាយុ៦៥ឆ្នាំ រស់នៅភូមិពងទឹក ឃុំវល្លិ៍សរ ស្រុកសំរោងទង បានបុកម៉ូតូ ១គ្រឿងម៉ាក Scopy ពណ៍ក្រហម ផ្លាកលេខភ្នំពេញ 1CT-4027 អ្នកបើកបរ ដោយឈ្មោះ ឈុន លីដា ភេទស្រី អាយុ ៣៦ឆ្នាំ រស់នៅភូមិញរ សង្កាត់កណ្ដោលដុំ ក្រុងច្បារមន (របួសធ្ងន់) រីឯអ្នករួមដំណើរ ២នាក់ របួសធ្ងន់ ម្នាក់ទៀតស្លាប់។
តាមការបញ្ជាក់ ពីជំនាញចរាចរណ៍ អ្នកបើកបររថយន្ត មានកម្រិតតជាតិស្រវឹង អាកុលលើសពីច្បាប់កំណត់ ទើបបណ្ដាលឱ្យបង្កគ្រោះថ្នាក់ ប៉ះពាល់អាយុជីវិតអ្នកដទៃបែបនេះ។
ក្នុងហេតុការណ៍ខាងលើ រថយន្តបានបន្ដទៅបុករបងផ្ទះទម្លុះចូលទៅខាងក្នុង តែសំណាងល្អមិនបង្កគ្រោះថ្នាក់ដល់អាយុជីវិតអ្នកដទៃ បំផ្លាញតែទ្រព្យសម្បត្តិតែប៉ុណ្ណោះ។
ករណីខាងលើសមត្ថកិច្ចជំនាញចរាចរណ៍ បានយកមធ្យោបាយ និងឃាត់ខ្លួនជាក់ស្ដែង អ្នកបើកបរ បញ្ជូន មកការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ស្ពឺ ដើម្បីចំណាត់ការនីតិវិធីបន្ដ៕
