បាត់ដំបង៖កម្លាំងនគរបាលជំនាញនៃអធិការដ្ឋាននគរបាលក្រុងបាត់ដំបងបានចុះស្រាវជ្រាវនិងឃាត់ខ្លួនជនសង្ស័យម្នាក់ពីបទជួញដូរនិងប្រើប្រាស់ថ្នាំញៀន។
ជនសង្ស័យឈ្មោះ ញុឹក ប៊ុនរ័ត្ន ភេទប្រុស អាយុ៤២ឆ្នាំ មានទីលំនៅក្នុងភូមិអូរតាគាំ២ សង្កាត់ទួលតាឯក ក្រុងបាត់ដំបង ត្រូវសមត្ថកិច្ចឃាត់ខ្លួនបានកាលពីវេលាម៉ោង១១និង៣០នាទីព្រឹក ថ្ងៃទី២៥ ខែធ្នូ ឆ្នាំ២០២១ នៅចំណុចភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។
យោងតាមបទបញ្ជាយ៉ាងមុឺងម៉ាត់របស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបងនិងមតិណែនាំពីលោកឧត្តមសេនីយ៍ត្រី កុយ ហៀង ស្នងការរង ផែនការងារបទល្មើសប្រឆាំងគ្រឿងញៀន ព្រមទាំងមានការសម្របសម្រួលនិតិវិធីដោយលោក កែវ សុជាតិ ព្រះរាជអាជ្ញា នៃអាយ្យរអមសាលាដំបូងខេត្តបាត់ដំបង ទើបលោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង ដឹកនាំកម្លាំងបង្ក្រាប និងឃាត់ខ្លួនជនសង្ស័យខាងលើក្នុងល្មើសជាក់ស្តែង។
វត្ថុតាងដែលសមត្ថកិច្ចដកហូតបានរួមមាន៖ម្សៅក្រាមពណ៌សចំនួន១០កញ្ជប់ ថ្នាំគ្រាប់ពណ៌ក្រហមសង្ស័យជាសាធាតុញៀនចំនួន១គ្រាប់ ទូរស័ព្ទដៃ១គ្រឿង ជញ្ជីងថ្លឹងថ្នាំញៀន១គ្រឿងនិងសម្ភារៈប្រើប្រាស់ថ្នាំញៀនមួយចំនួនទៀត។
បច្ចុប្បន្នជនសង្ស័យត្រូវបានឃុំខ្លួនជាបណ្តោះអាសន្ននៅអធិការដ្ឋាននគរបាលក្រុងបាត់ដំបង ដើម្បីធ្វើការសាកសួរនិងរៀបចំសំណុំរឿងបញ្ជូនទៅការិយាល័យបទល្មើសគ្រឿងញៀននៃស្នងការដ្ឋាននគរបាលខេត្តបាត់ដំបងចាត់ការបន្តទៅតាមនិតិវិធី៕ ដោយ សុខ កុសល
