ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបជូនគណនីហ្វេសបុកដែលសុំមិនបញ្ចេញឈ្មោះ បានផ្ញើសារក្នុងប្រអប់សារផេក ស្នងការដ្ឋាននគរបាលខេត្តកណ្តាល មានខ្លឹមសារថា ៖ សូមបងបងប៉ូលីសជួយត្រួតពិនិត្យមើលទីតាំងជល់មាន់មួយកន្លែងនៅភូមិក្រាំងស្បូវ ឃុំព្រះពុទ្ធស្រុកកណ្តាលស្ទឹង ខេត្តកណ្តាលផង។ កន្លែងតាសក់ស ក្រោមការគ្រប់គ្រងតាសក់ស មេឆ្នោតវៀតណាម។ ចាំមើលលោកប៉ូលីសធ្វើការចេញអត់?។
ក្រោយពីទទួលបានព័ត៌មាននេះភ្លាម ដោយមានការចង្អុលបង្ហាញពីក្រុមការងារប្រតិកម្មរហ័សខេត្ត លោកអធិការ និងក្រុមប្រតិកម្មរហ័ស នៃអធិការដ្ឋាននគរបាលស្រុកកណ្តាលស្ទឹង បានបញ្ជាឲ្យកម្លាំងផ្នែកព្រហ្មទណ្ឌ និង កម្លាំងប៉ុស្តិ៍នគរបាលរដ្ឋបាលឃុំព្រះពុទ្ធ ចុះស្រាវជ្រាវករណីខាងលើ ។
ជាលទ្ធផល៖ ថ្ងៃពុធ ០៤កើត ខែមិគសិរ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃ០៨ ខែធ្នូ ឆ្នាំ២០២១ កម្លាំងប៉ុស្តិ៍នគរបាលរដ្ឋបាលព្រះពុទ្ធ រួមសហការជាមួយកម្លាំងផ្នែកជំនាញនគរបាលព្រហ្មទណ្ឌ នៃអធិការដ្ឋាននគរបាលស្រុកកណ្ដាលស្ទឹង ដឹកនាំដោយលោក វរសេនីយ៍ទោ ស៊ឹម គឹមស៊ុន អធិការរងទទួលផែនព្រហ្មទណ្ឌ ដោយយោងតាមការចុះពិនិត្យ ស្រាវជ្រាវទៅដល់ទីតាំងខាងលើបានឲ្យដឹងថា ៖ នៅក្នុងភូមិ ក្រាំងស្បូវ ឃុំព្រះពុទ្ធ កន្លងមកមានតូបកាហ្វេ ០១កន្លែង របស់ឈ្មោះ បូ ដានី ភេទស្រី អាយុ៤០ឆ្នាំ ដែលបងប្អូនប្រជាពលរដ្ឋមកទទួលទានកាហ្វេ និងជួបជុំសំណេះសំណាលគ្នាជារៀងរាល់ថ្ងៃ។ ដោយឡែកក្នុងសម័យកាលកូវីដ-១៩ នេះ ម្ចាស់ទីតាំងខាងលើគឺពុំអនុញ្ញាតឲ្យមានការជួបជុំគ្នាដូចមុនទៀតនោះទេ។ (ដោយឡែកកន្លែងដែលថា៖ តាសក់ស និងតាសក់សគ្រប់គ្រងនេះ គឺពុំមាននៅក្នុងមូលដ្ឋាននេះទេ) ស្ថិតក្នុងភូមិក្រាំងស្បូវ នេះគឺមានតែរោងកាហ្វេមួយកន្លែងនេះគត់។ ហើយកន្លងមកធ្លាប់បានកម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាល សហការជាមួយកម្លាំងផ្នែកព្រហ្មទណ្ឌស្រុកកណ្តាលស្ទឹង ធ្វើការបង្ត្រាបទីតាំងនេះ និង ធ្លាប់បានធ្វើកិច្ចសន្យាអប់រំបញ្ឈប់សកម្មភាពលេងល្បែងស៊ីសងខុសច្បាប់(ភ្នាល់មាន់ជល់តាមអនឡាញ) ម្ដងរួចមកហើយ។
បច្ចុប្បន្នទីតាំងខាងលើនេះគឺពុំមានការជួបជុំ និងលេងល្បែងស៊ីសងខុសច្បាប់(ភ្នាល់មាន់ជល់តាមអនឡាញ)ទៀតនោះទេ។ ក្រោយពេលចុះដល់ទីតាំងខាងលើនេះ កម្លាំងផ្នែកព្រហ្មទណ្ឌស្រុកសហការជាមួយប៉ុស្តិ៍រដ្ឋបាលព្រះពុទ្ធ និងអាជ្ញាធរភូមិឃុំ បានពិនិត្យឃើញថា គឺពុំមានការជួបជុំ លេងល្បែងស៉ីសង (ភ្នាល់ជល់មាន់តាមអនឡាញ នោះទេ។ បន្ទាប់មកសមត្ថកិច្ចបានធ្វើកិច្ចសន្យាបន្ថែម ក្នុងករណីបើមានការលេងល្បែងស៉ីសងខុសច្បាប់នោះទៀតម្ចាស់ទីតាំងខាងលើត្រូវទទួលខុសត្រូវចំពោះមុខច្បាប់។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គមមេត្តាជ្រាប៕
