បើកលេងល្បែងស៊ីសង (ជល់មាន់ តាមទូរទស្សន៍ និង បុកប៊ីយែរ) ដុះស្លែ ! ពលរដ្ឋ រាយការណ៍ ភ្លាម ប៉ូលិស ទៅដល់ភ្លេត!
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមធ្វើការឆ្លើយតបទៅកាន់ម្ចាស់គណនីហ្វេសប៊ុកសុំមិនបញ្ចេញឈ្មោះ ដែលបានឆាតរាយការណ៍ ក្នុងប្រអប់សារផេកស្នងការដ្ឋាននគរបាលខេត្តកណ្ដាល មានខ្លឹមសារថា៖ «ខ្ញុំបាទជាប្រជាពលរដ្ឋនៅក្នុងភូមិកោះចិន ស្រុកពញាឮ ខេត្ដកណ្ដាល សូមគោរពចូលមកស្នងការដ្ឋាននគរបាលខេត្តកណ្ដាល ដោយសេចក្ដីគោរព!»
កម្មវត្ថុ ដោយមានវង់ល្បែងមួយកន្លែងដុះស្លែច្រើនឆ្នាំកន្លងមកហើយពុំមានអាជ្ញាធរមកទប់ស្កាត់ឡើយនេះបើតាមខ្ញុំដឹងគឺមានអំពើពុករលួយនៅក្នុងនឹងកន្លែងដែលប្រព្រឹត្តនោះនៅក្នុងភូមិកោះចិន (ខាងលិចជាប់មាត់ទន្លេ) ដែលមានម្ចាស់ផ្ទះ ឈ្មោះ បាំង ភារិទ្ធ ។
ខ្ញុំបាទបានដឹងថាលោកមេភូមិ និងលោកមេប៉ុស្ដិ៍ឧស្សាហ៍មកកន្លែងនេះដែរ តែមិនដែលឃើញបង្ក្រាបទេ សូមឯកឧត្ដមមេត្តាជួយដល់ប្រជាពលរដ្ឋ ដែលរស់នៅជិតខាងផងព្រោះមានសំឡេងស្រែកហ៊ោខ្លាំងៗ ព្រោះថាមានតែស្នងការដ្ឋាននគបាលខេត្តកណ្ដាល ទេជាម៉ែជាឪសំរាប់ស្រុកពញាឮ និយាយជារួម និងសំរាប់ឃុំកោះចិន និយាយដោយឡែក សូមឯកឧត្ដមមេត្តាលាក់ឈ្មោះខ្ញុំបាទផង យើងខ្ញុំនឹងសង្ឃឹមថាខ្ញុំអាចទទួលបាននូវការដោះស្រាយបញ្ហាប្រឈមនានាដែលនៅក្នុងឃុំកោះចិន សូមគោរពជូនពរដល់ឯកឧត្តមជោគជ័យគ្រប់ភារកិច្ច និងប្រកបដោយប្រសិទ្ធភាពខ្ពស់ក្នុងការពារជូនប្រជាពលរដ្ឋ”។
បន្ទាប់ពីទទួលបានព័ត៌មានខាងលើ ដោយមានការចង្អុលបង្ហាញពីក្រុមការងារប្រតិកម្មរហ័សខេត្ត ដឹកនាំដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល លោកវរសេនីយ៍ឯក ដួង តេង អធិការនគរបាលស្រុកពញាឮ បានបញ្ជាឱ្យកម្លាំងផ្នែកនគរបាលយុត្តិធម៍ សហការជាមួយកម្លាំងប៉ុស្ដិ៍នគរបាលរដ្ឋបាលកោះចិន ពិនិត្យនិងស្រាវជ្រាវករណីខាងលើ។
ជាលទ្ធផល៖ នៅថ្ងៃសុក្រ ទី២៦ ខែវិច្ឆិកា ឆ្នាំ២០២១ វេលាម៉ោង០៩និង១០នាទីព្រឹក កម្លាំងផ្នែកនគរបាលយុត្តិធម៌ បានសហការជាមួយកម្លាំងនគរបាលប៉ុស្ដិ៍រដ្ឋបាលកោះចិន ចុះទៅដល់ផ្ទះរបស់ប្រជាពលរដ្ឋឈ្មោះ បាំង ភារិទ្ធ ភេទប្រុស អាយុ៣៦ឆ្នាំ ជនជាតិខ្មែរ ប្រកបមុខរបរជាងទង មានទីលំនៅភូមិកោះចិន ឃុំកោះចិន ស្រុកពញាឮ ខេត្តកណ្ដាល ដើម្បីសួរនាំពាក់ព័ន្ធនឹងការរាយការណ៍របស់ប្រជាលរដ្ឋខាងលើ។ ម្ចាស់ទីតាំងខាងលើ បានសារភាពថាពិតជាមាន បើកលេងល្បែងស៊ីសង (ជល់មាន់តាមទូរទស្សន៍ និង បុកប៊ីយែរ) ដូចការរាយការណ៍របស់ប្រជាពលរដ្ឋពិតប្រាកដមែន។ បន្ទាប់មកកម្លាំងសមត្ថកិច្ចបានអប់រំ ណែនាំ និងធ្វើកិច្ចសន្យាដល់ម្ចាស់ទីតាំងខាងលើឱ្យបញ្ឈប់ការបើកលេងល្បែងស៊ីសងខុសច្បាប់គ្រប់ប្រភេទបន្តទៀត។
ប្រជាពលរដ្ឋដែលជាម្ចាស់ទីតាំងខាងលើ បានយល់ព្រមតាមការណែនាំរបស់សមត្ថកិច្ច ហើយសន្យាថានឹងបញ្ឈប់ការបើកលេងល្បែងស៊ីសងខុសច្បាប់ គ្រប់ប្រភេទបន្តទៀតហើយ។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គមមេត្តាជ្រាបជាព័ត៌មាន៕
