ខេត្តពោធិ៍សាត់ ៖ បុរសម្នាក់ ត្រូវកម្លាំងប៉ុស្តិ៍នគរបាលរដ្ឋបាលមេទឹក ឃាត់ខ្លួន ពីបទប្រើអំពើហិង្សា ក្នុងគ្រួសារ វាយប្រពន្ធ មួយដៃចំភ្នែកខាងស្ដាំ នៅចំណុចភូមិមេទឹក ឃុំមេទឹក ស្រុកបាកាន ខេត្តពោធិ៍សាត់។
លោកវរសេនីយ៍ឯក នាង វុធ អធិការនគរបាលស្រុកបាកានបានឲ្យដឹងថា ករណីហិង្សានេះបង្កឡើង កាលពីថ្ងៃទី២២ ខែវិច្ឆិកា ឆ្នាំ២០២១ វេលាម៉ោង១៩ និង៥០នាទី ដោយឈ្មោះ យឿន ងី ភេទប្រុស អាយុ ៣៥ឆ្នាំ (ត្រូវជាប្ដី) រស់នៅភូមិឃុំកើតហេតុខាងលើ ផឹកស្រាស្រវឹង ហើយបានវាយ ប្រពន្ធឈ្មោះ នាង សុខលីន ភេទស្រី អាយុ ៣៤ឆ្នាំ រស់នៅភូមិជាមួយគ្នា ចំនួន ១ដៃចំភ្នែក ខាងស្តាំ (របួសស្រាល) ។
លោកអធិការ បន្តទៀតថា ករណីហិង្សានេះបណ្ដាលមកពីមូលហេតុស្រវឹងស្រា និងខឹងប្រពន្ធស្តីអោយថាមិនជួយមើលកូន ។
ចំពោះជនសង្ស័យត្រូវបានសមត្ថកិច្ចឃាត់ខ្លួនយកមកប៉ុស្តិ៍នគរបាលរដ្ឋបាលមេទឹកដើម្បីសួរនាំតាមនីតិវិធី៕
