ហាងចិនមួយកន្លែង បេីកចាក់ធុងបាសលាន់លឺសម្លេងខ្លាំងៗ តាំងពីព្រឹករហូតដល់យប់ជ្រៅរាល់ថ្ងៃ ! ប៉ូលិស ធ្វើកិច្ចសន្យា ឲ្យបញ្ឈប់ហើយ!
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបជូនគណនីហ្វេសបុកសុំមិនបញ្ចេញឈ្មោះ ដែលបានផ្ញើសារក្នុងផេកស្នងការដ្ឋាននគរបាលខេត្តកណ្ដាល មានខ្លឹមសារថាៈ យេីងខ្ញុំជាប្រជាពលរដ្ឋដែលរស់នៅក្នុងឃុំសំពៅពូន ស្រុកកោះធំ មាន ហាងចិនមួយកន្លែង បេីកចាក់ធុងបាសលាន់លឺសម្លេងខ្លាំងៗតាំងពីព្រឹករហូតដល់យប់ជ្រៅរាល់ថ្ងៃ ធ្វើអោយរំខានដល់ដំណេកអ្នកជិតខាងរកដេកពុំលក់យ៉ាងខ្លាំង ទីតាំងចូលពីផ្លូវជាតិ២១ តាមវត្តព្រែកស្បូវ ២០០ម៉ែត្រ ស្ថិតនៅក្នុងភូមិព្រែកស៊ឹង ឃុំសំពៅពូន ស្រុកកោះធំ ខេត្តកណ្ដាល។
ក្រោយពីទទួលបានព័ត៌មានខាងលេីរួច និងមានការចង្អុលបង្ហាញពីក្រុមការងារប្រតិកម្មរហ័សខេត្ត លោកវរសេនីយ៍ឯក ស៊ីម ឃាង អធិការនគរបាលស្រុក បានបញ្ជាអោយសមត្ថកិច្ចនគរបាលប៉ុស្ដិ៍រដ្ឋបាលសំពៅពូន ចុះពិនិត្យមេីលជាបន្ទាន់ករណីនេះ។
ជាលទ្ធផល នាសៀលថ្ងៃទី១៩ ខែមិថុនា ឆ្នាំ២០២១ កម្លាំងនគរបាលប៉ុស្ដិ៍សំពៅពូន បានចុះដល់ទីតាំងខាងលើដែលមានម្វាស់ផ្ទះឈ្មោះ សុីង អុីយូ ភេទប្រុស អាយុ៤១ឆ្នាំ ជនជាតិចិន មានមុខរបលក់ដូរ កាន់លិខិតឆ្លងដែនលេខ EE7599370 ស្នាក់នៅភូមិព្រែកសុឹង ឃុំសំពៅពូន ស្រុកោះធំ ខេត្តកណ្តាល ។ បន្ទាប់មសមត្ថកិច្ចពិនិត្យឃើញថា ម្ចាស់ហាងខាងលើពិតជាបានចាក់ធុងបាសឮៗរហូតដល់យប់ជ្រៅបង្ករការរំខានដល់ប្រជាពលរដ្ឋដែលរស់នៅក្បែរៗនោះ ប្រាកដមែន។ ហើយសមត្ថកិច្ចបានធ្វើកិច្ចសន្យា ឲ្យបញ្ឈប់រាល់ការចាក់ធុងបាស ឬឧបករណ៍បំពងសម្លេងផ្សេងៗដែលបង្ករការរំខានដល់ប្រជាពលរដ្ឋរស់នៅក្បែរៗនោះតទៅទៀត។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គមមេត្តាជ្រាប៕