ភ្នំពេញ៖ ករណីគ្រោះថ្នាក់ចរាចរណ៍ រវាងរថយន្តពីរគ្រឿង ត្រង់ចំណុចផ្លូវបំបែក បណ្តាលអោយរងការខូចខាតទាំងសងខាង សំណាងម្ចាស់រថយន្ត មិនរងរបួស។
ហេតុការណ៍នេះកើតឡើងនៅវេលាម៉ោង ១២រំលងអធ្រាត្រឈានចូលថ្ងៃទី២០ ខែមិថុនា ឆ្នាំ២០២១ ដោយទីតាំងស្ថិតនៅតាមបណ្តោយផ្លូវ១៦៣ កែងផ្លូវ៤៦៨ សង្កាត់ទួលទំពូងទី១ ខណ្ឌចំការមន រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានអោយដឹងថា៖ រថយន្តមួយគ្រឿងម៉ាកហាយឡេនឌឺ ពណ៌ស ពាក់ស្លាកលេខ តាកែវ 2A-1988 ធ្វើដំណើរតាមបណ្តោយផ្លូវ១៦៣ ក្នុងទិសដៅពីផ្សារទួលទំពូងទៅរង្វង់មូលផ្សារដើមថ្កូវ ខណៈមកដល់ចំណុចកើតហេតុត្រង់ផ្លូវ១៦៣ កែង៤៦៨ ក៏បានរ៉េចង្កូតទៅឆ្វេងឆ្លងគន្លងផ្លូវបុកពេញទំហឹងជាមួយ រថយន្តឡង់គ្រីស័រ មួយគ្រឿង ពណ៌ខ្មៅ ពុំមានស្លាកលេខ តែមានស្លាកសម្គាល់អក្សរ POLICE បានធ្វើដំណើរតាមបណ្តោយផ្លូវ១៦៣ ក្នុងទិសដៅពីរង្វង់មូលផ្សារដើមថ្កូវ ឈ្ពោះទៅកាន់ផ្សារទួលទំពូង។ បណ្តាលអោយរថយន្តហាយឡេនឌឺ រងការខូចខាតផ្នែកខាងមុខ ចំណែករថយន្តឡង់គ្រីស័រ រងការខូចខាតផ្នែកខាងមុខ ខាងឆ្វេង និងបែកកង់ក្រោយទាំងសងខាង។
គួរបញ្ជាក់ផងដែរថា៖ ករណីគ្រោះថ្នាក់ខាងលើនេះ មិនបណ្តាលអោយនរណាម្នាក់រងរបួសនោះទេ។
ក្រោយពេលកើតហេតុ សមត្ថកិច្ច និងប៉ូលីសចរាចរណ៍បានចុះមកដល់ទីតាំងខាងលើ និងធ្វើការវាស់វែង រីឯម្ចាស់រថយន្តទាំងសងខាង ក៏បានធ្វើការសម្របសម្រួលគ្នាតាមនីតិវិថីផងដែរ៕
ដោយ៖ ភូមិស័ក្តិ
