បាត់ដំបង៖នៅវេលាម៉ោង២និង៤៥នាទី រសៀល ថ្ងៃទី១៩ ខែមិថុនា ឆ្នាំ២០២១ កម្លាំងនគរបាលក្រុងបាត់ដំបងដឹកនាំលោកវរសេនីយ៍ឯកពេជ្រ សារ៉ែន ចុះឃាត់ខ្លួនជនសង្ស័យ១នាក់ ពាក់ពាក់ព័ន្ធករណីជួញដូរគ្រឿងញៀន អនុវត្តន៍តាមបទបញ្ជា ពីលោកឧត្តមសេនីយ៍ទោ សាត គឹមសាន និងមានការសម្របសម្រួលនិតិវិធីដោយលោក កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបងផងដែរ។
ជនសង្ស័យឈ្មោះ៖នៅ រស្មី ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិកំពង់សីមា សង្កាត់វត្តគរ ក្រុងបាត់ដំបង ខេត្តបាត់ដំបង។
វត្ថុតាងដែលសមត្ថកិច្ចដកហូតបានរួមមាន៖ថ្នាំញៀនប្រភេទមេតំហ្វេតាមីន (ម៉ាទឹកកក) ចំនួន១២កញ្ចប់ ទម្ងន់៥,៤៣ក្រាម ទូរស័ព្ទដៃ១គ្រឿង កូនកាបូបដាក់លុយចំនួន១ ជញ្ជីងថ្លឹងថ្នាំញៀន១គ្រឿង និងសម្ភារៈប្រើប្រាស់ថ្នាំញៀនមួយចំនួនទៀត។
បច្ចុប្បន្នជនសង្ស័យនិងវត្ថុតាងត្រូវបានកម្លាំងជំនាញនៃអធិការដ្ឋាននគរបាលក្រុងបាត់ដំបងរៀបចំសំណុំរឿងបញ្ជូនទៅការិយាល័យប្រឆាំងបទល្មើសគ្រឿងញៀនស្នងការខេត្តបាត់ដំបងដើម្បីចាត់ការបន្តទៅតាមនិតិវិធី៕ដោយ ៖ សុខ កុសល
