យករូបភាពចាស់( ទីតាំងល្បែងស៉ីសងតាមប្រព័ន្ធអនឡាញ) មកផុស ធ្វេីឲ្យប្រជាពលរដ្ឋ មានការយល់ច្រឡំ!
សេចក្តីបកស្រាយបំភ្លឺរបស់ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ទាក់ទងទៅនឹងផេកហ្វេសបុកមួយ បានយកព័ត៌មាន ចាស់មកផុសដែលធ្វេីឲ្យប្រជាពលរដ្ឋមានការយល់ច្រឡំ។
ជាក់ស្តែងទីតាំងដូចបានចុះផ្សាយត្រូវបានសមត្ថកិច្ចនៃអធិការដ្ឋាននគរបាលខណ្ឌពោធិ៍សែនជ័យ បានធ្វេីការចុះបង្ក្រាបតាំងពីថ្ងៃទី១៧ ខែមីនា ឆ្នាំ២០២១ វេលាម៉ោង ១៥:០០នាទី នៅចំណុចហាងកាហ្វេយីហោឈ្មោះ យ៉ុង យី ស្ថិតនៅក្នុងបូរីរុងរឿង ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដោយមានការរាយការណ៍ពីប្រជាពលរដ្ឋ និងមានការផ្សព្វផ្សាយតាមបណ្ដាញសង្គមហ្វេសប៊ុក មកកាន់សមត្ថកិច្ចថា ទីតាំងខាងលេីមានបង្កប់ការលេងល្បែងស៉ីសងតាមប្រព័ន្ធអនឡាញ និងមានសម្លេងរំខានដល់ប្រជាពលរដ្ឋ ក្រោយពីបានទទួលបានពត៌មានភ្លាម នៅថ្ងៃខែខាងលេី កម្លាំងសមត្ថកិច្ចបានសហការជាមួយលោកចៅសង្កាត់ចោមចៅទី១ លោកមេភូមិទួលពង្រ និងកម្លាំងពាក់ព័ន្ធ បានចុះទៅដល់ទីតាំងខាងលេីហេីយបានធ្វេីការណែនាំអប់រំ ធ្វេីកិច្ចសន្យាជាមួយម្ចាស់ទីតាំង និងបានដកហូតសម្ភារ:មួយចំនួនដែលពាក់ព័ន្ធនិងល្បែងស៉ីសងតាមប្រព័ន្ធអនឡាញផងដែរ ។
ក្រោយពីបានធ្វេីកិច្ចសន្យាណែនាំអប់រំជាមួយម្ចាស់ទីតាំងរួចមកទីតាំងខាងលេី គឺមិនមានការលេងល្បែងស៉ីសងតាមរយ:ប្រព័ន្ធអនឡាញទៀតនោះទេ ។
រហូតមកដល់ថ្ងៃទី១៨ ខែមិថុនា ឆ្នាំ២០២១ ប៉ុស្តិ៍នគរបាលរដ្ឋបាលចោមចៅទី១ បានទទួលពត៌មាន ពីក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ថា ទីតាំងលក់កាហ្វេយីហោឈ្មោះ យ៉ុង យី (ទីតាំងធ្លាប់បានបង្ក្រាប និងធ្វេីកិច្ចសន្យា) ដែលមានទីតាំងក្នុងបូរីរុងរឿង ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យរាជធានីភ្នំពេញ កំពុងមានការបង្កប់លេងល្បែងស៉ីសងតាមប្រព័ន្ធអនឡាញ ក្រោយពីបានទទួលបានពត៌មានភ្លាម កម្លាំងប៉ុស្តិ៍ចោមចៅទី១ បានចុះទៅដល់ទីតាំងខាងលេី ជាក់ស្ដែងគឺទីតាំងខាងលេីបាន បិទទ្វារ មិនមានដំណេីរការលេងល្បែងដូចការចុះផ្សាយនោះទេ ។
បេីសិនជាទីតាំងយីហោឈ្មោះ យ៉ុងយី មានការបេីកការលេងល្បែងស៉ីសងណាមួយ កម្លាំងប៉ុស្តិ៍ចោមចៅទី១នឹងធ្វេីការចុះបង្ក្រាប និងអនុវត្តបន្តតាមនីតិវិធីច្បាប់ ៕
