ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ ឧបត្ថម្ភក្រុមពេទ្យ និងក្រុមការងារចាក់វ៉ាក់សាំងការពារជំងឺកូវីដ-១៩ ក្រសួងការពារជាតិ
ភ្នំពេញ៖អំណោយឧបត្ថម្ភរបស់ឯកឧត្តម នាយឧត្តមសេនីយ៍ កែ គឹមយ៉ាន តំណាងរាស្រ្ត ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ឧកញ៉ាហេមចិត្តាមហាឧបាសិកាពុទ្ធសាសនូបត្ថម្ភ ម៉ៅ ម៉ាល័យ មានទឹកក្រូច ទឹកសុទ្ធ និងមី ត្រូវបានប្រគល់ដេីម្បីឧបត្ថម្ភដល់ក្រុមពេទ្យ និងក្រុមការងារចាក់វ៉ាក់សាំងការពារជំងឺកូវីដ-១៩ នៃកងយោធពលខេមរភូមិន្ទ ជូនប្រជាពលរដ្ឋនិងកម្មករក្នុងភូមិសាស្រ្តរាជធានីភ្នំពេញ។
ពិធីប្រគល់-ទទួលអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្រ្តី កែ គឹមយ៉ាន និងលោកជំទាវ ម៉ៅ ម៉ាល័យ នាពេលនេះ ប្រព្រឹត្តិទៅតាមរយ:ឯកឧត្តម នាយឧត្តមសេនីយ៍ ជួន សុវណ្ណ អនុប្រធាន តំណាងដ៏ខ្ពង់ខ្ពស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាល័យ កែ គឹមយ៉ាន និងឯកឧត្តម នាយឧត្តមសេនីយ៍ ម៉ក់ សារុន អគ្គបញ្ជាការរង និងជាអនុប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក.ព.ជ នាព្រឹកថ្ងៃទី១៤ ខែឧសភា ឆ្នាំ២០២១នេះ នៅទីបញ្ជាការដ្ឋានកងវិស្វកម្ម។
ពិធីប្រគល់-ទទួលនេះ ក៏មានការអញ្ជេីញចូលរួមពីឯកឧត្តម នាយឧត្តមសេនីយ៍ ឧត្តមសេនីយ៍ នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បញ្ជាការដ្ឋានកងវិស្វកម្ម និងខុទ្ទកាល័យ ឯកឧត្តម ឧបនាយករដ្ឋមន្ត្រី កែ គឹមយ៉ាន ផងដែរ។
ឯកឧត្តម នាយឧត្តមសេនីយ៍ ម៉ក់ សារុន អគ្គបញ្ជាការរង និងជាអនុប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ បានមានប្រសាសន៍ស្វាគមន៍ និងរបាយការណ៍ពីអនុវត្តន៍ផែនការចាក់វ៉ាក់សាំងជូនប្រជាពលរដ្ឋប្រកបដោយប្រសិទ្ធភាពនិងការទទួលខុសត្រូវខ្ពស់ និងបានថ្លែងអំណរគុណដល់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវម៉ៅ ម៉ាល័យ ដែលបានឧបត្ថម្ដដល់ក្រុមពេទ្យ និងក្រុមការងារចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋនិងកម្មករក្នុងភូមិសាស្រ្តរាជធានីភ្នំពេញក្រសួងការពារជាតិដែលបាននិងកំពុងបំពេញការងាររបស់ខ្លួនយ៉ាងមមាញឹក។
ថ្លែងក្នុងនាមឯកឧត្តម ឧបនាយករដ្ឋមន្ត្រី កែ គឹមយ៉ាន នាឱកាសនោះ ឯកឧត្ដម នាយឧត្តមសេនីយ៍ ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន ពាំនាំបណ្តាំសាកសួរសុខទុក្ខដល់វិរកងទ័ពដ៏អង់អាចក្លាហានលះបង់អាយុជិវិតក្នុងបុព្វហេតុជាតិនិងមាតុភូមិ ហេីយបានវាយតម្លៃខ្ពស់ចំពោះក្រុមការងារចាក់វ៉ាក់សាំងជូនប្រជាពលរដ្ឋនិងកម្មករក្នុងភូមិសាស្រ្តរាជធានីភ្នំពេញ យ៉ាងសស្រាក់សស្រាំរបស់ក្រុមពេទ្យ និងក្រុមការងារចាក់វ៉ាក់សាំងការពារជំងឺកូវីដ-១៩ ក្រសួងការពារជាតិ។
អំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ ប្រគល់ជូនដល់ក្រុមការងារចាក់វ៉ាក់សាំង នៃគណៈកម្មការចំពោះកិច្ចចាក់វ៉ាក់សាំងកូវីដ ១៩ ក.ព.ជ នាឱកាសនោះ មាន ១.ទឹកសុទ្ធចំនួន១៦១៥កេស ២.ទឹកក្រូច ១០០០កេស មី១០០០កេស។
