(ខេត្តស្វាយរៀង)៖ ករណីគ្រោះថ្នាក់ចរាចរណ៍ ស្ត្រីម្នាក់ដាច់ជើងស្តាំម្ខាង ទើនៅម៉ូតូ មើលទៅគួរឲ្យរន្ធត់ចិត្ត និងមនុស្សប្រុស-ស្រី២នាក់ផ្សេងទៀតរងរបួសធ្ងន់ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២:០០នាទី នៅថ្ងៃទី១១ ខែឧសភា ឆ្នាំ២០២១ នៅលើផ្លូវជាតិលេខ១ ចន្លោះគីឡូម៉ែត្រលេខ១៣៣/១៣៤ ស្ថិតក្នុងភូមិព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង ។
យោងតាមសមត្ថកិច្ចបានឲ្យដឹងថា៖ នៅមុនពេលកើតហេតុមានម៉ូតូមួយគ្រឿងម៉ាក HONDA DREAM C125 ស៊េរីឆ្នាំ២០២០ ពណ៌ខ្មៅ ស្លាកលេខស្វាយរៀង 1Q-3600 បើកបរដោយឈ្មោះ រឿន ចិត្ត ភេទប្រុស អាយុ២៤ឆ្នាំ ជនជាតិខ្មែរ មុខរបរកម្មកររោងចក្រ រស់នៅភូមិខ្នុរ ឃុំរមាំងថ្កោល ស្រុកស្វាយទាប បានធ្វើដំណើរក្នុងទិសដៅពីលិចទៅកើត រងរបួសធ្ងនសន្លប់(ពាក់មួកសុវត្ថិភាព)។
ប្រភពបានបន្តទៀតថា៖ លុះមកដល់កន្លែងកើតហេតុខាងលើ បានជ្រុលទៅបុកម៉ូតូមួយគឿងទៀត ម៉ាក HONDA DREAM ស៊េរីឆ្នាំ២០១៨ ពណ៌ខ្មៅ ស្លាកលេខ ភ្នំពេញ 1HC-7762 ចំពីចំហៀងខាងស្តាំ ក្នុងទិសបញ្ច្រាស់ទិសគ្នាពីកើតទៅលិច បើកបរឈ្មោះ សោម សាម៉ុន ភេទស្រី អាយុ២៣ឆ្នាំ ជនជាតិខ្មែរ មុខរបរកសិករ រស់នៅភូមិព្រៃបឹង ឃុំម៉ឺនជ័យ ស្រុករំដួល ខេត្តស្វាយរៀង រងរបួសធ្ងន់ (ដាច់ជើងខាងស្តាំ) មិនពាក់មួកសុវត្ថិភាព និងអ្នករួមដំណើរម្នាក់ឈ្មោះ ឌុល យ៉ាទី ភេទស្រី អាយុ១៩ឆ្នាំ ជនជាតិខ្មែរ រស់នៅភូមិទួលទ្រា ឃុំជ្រុងពពេល ស្រុករំដួល រងរបួសធ្ងន់ (មិនពាក់មួកសុវត្ថិភាព) ។
ចំពោះករណីនេះដែរ អ្នករងរបួសបានបញ្ចូលទៅព្យាបាលនៅមន្ទីរពេទ្យខេត្តស្វាយរៀង រីឯមធ្យោបាយទាំងពីរគ្រឿងយកមករក្សាទុកនៅអធិការដ្ឋាននគរបាលស្រុកស្វាយទាប ដើម្បីរងចាំដោះស្រាយគ្នានៅពេលក្រោយ៕ ដោយ:ខ្លាខ្មៅ
