ស្នងការនគរបាលខេត្តកំពត ចុះចែកម៉ាស់ជូនដល់ អ្នករត់កង់បី ផាស់អាប់ និងម៉ូតូឌុប ក្នុងក្រុងកំពត!
ខេត្តកំពត៖ នៅថ្ងៃអង្គារ ៩កើត ខែពិសាខ ឆ្នាំឆ្លូវ ត្រីស័ក ព.ស. ២៥៦៤ ត្រូវនឹងថ្ងៃទី ២០ ខែមេសា ឆ្នាំ២០២១ លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានដឹកនាំកម្លាំងនគរបាល នៃស្នងការដ្ឋាននគរបាលខេត្តកំពត ធ្វើការចែកម៉ាស់ជូនដល់អ្នករត់កង់បី ផាស់អាប់ និងម៉ូតូឌុប ក្នុងក្រុងកំពត ចំនួន ១៤០ប្រអប់ និងម៉ាស់ក្រណាត់ ១៥០ម៉ាស់ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ក៏បានអំពាវនាវដល់ប្រជាពលរដ្ឋ អនុវត្តនូវវិធានការ ៣ការពារ និង ៣កុំ។
វិធានការ ៣ការពារ រួមមាន៖
១- ពាក់ម៉ាស់
២- លាងដៃ
៣- គម្លាតសុវត្ថិភាពសង្គម និងគម្លាតសុវត្ថិភាពបុគ្គល ដោយចាប់ពី ១ម៉ែត្រកន្លះឡើងទៅ ឱ្យបានគ្រប់គ្នា នៅគ្រប់ទីកន្លែង និងអនុវត្តឱ្យបានគ្រប់គ្នា។
សម្ដេចតេជោ បញ្ជាក់ថា ចំណុច ៣ ការពារនេះ សំខាន់ខ្លាំងណាស់ ធ្វើដូច្នេះទើបអាចយកឈ្នះលើជំងឺកូវីត-១៩ បានដោយជោគជ័យ។
៣កុំ រួមមាន៖
១- កុំចូលទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក រកកន្លែងមានខ្យល់ចេញចូល ។
២- កុំទៅកន្លែងមានមនុស្សច្រើនកុះករ ។
៣- កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម ពេលជួបគ្នា អ្នកមានផ្តាសាយ ឬសង្ស័យមានជំងឺកូវីត-១៩ កុំចេញក្រៅ ឬកុំមកកន្លែង ធ្វើការ ហើយត្រូវទាក់ទងទៅគ្រូពេទ្យ៕
