ខេត្តតាកែវ៖ បុរស ជាជាងផ្សាដែកម្នាក់ ប្រកប របរ ផ្សាដែក មិនសូវ កាក់កប បានបែកគំនិត ប្តូរ មុខរបរ មករកស៊ីលក់ គ្រឿងញៀន ម្តង ក្រែងកាកកប មានអី ត្រូវបាន កម្លាំងកងរាជអាវុធហត្ថនៃការិយាល័យប្រឆាំងគ្រឿងញៀនខេត្តតាកែវ សហការជាមួយកម្លាំងអាវុធហត្ថស្រុកកោះអណ្តែត ចាប់ខ្លួន កាលពីថ្ងៃទី៦ ខែមេសា ឆ្នាំ ២០២១ ម្សិលមិញ។
ការចុះបង្រ្កាបនេះ មាន ការ សម្របសម្រួល នីតិវិធីពីលោក ជីវ ចាន់តារា ព្រះរាជ អាជ្ញា អមសាលាដំបូង ខេត្ត តាកែវ បាន ចុះ បង្រ្កាប ករណីជួញដូរ គ្រឿងញៀន នៅ ចំណុច ភូមិ ព្រៃបាយ ឃុំពេជ្រសារ ស្រុកកោះអណ្តែត ដោយ ឃាត់ខ្លួនបានជនសង្ស័យ ម្នាក់ រួម ជាមួយ វត្ថុតាង ជាគ្រឿងញៀន មួយ ចំនួន។
ជនសង្ស័យ មានឈ្មោះ ឃុន លុកគោ (ហៅគោ ) ភេទប្រុស អាយុ ៣៨ឆ្នាំ មុខរបរជាងផ្សារដែក និងមានដឺកាចាប់ខ្លួន ពីលោកចៅក្រមស៊ើបសួរ នូ ដារ៉ា ចុះថ្ងៃទី២២ ខែមីនា ឆ្នាំ ២០២០ ពីបទជួញដូរគ្រឿងញៀននេះដែរ។
ក្នុងនោះ សមត្ថកិច្ច ដកហូតបានវត្ថុតាង រួមមាន៖ ក្រាមពណ៌សថ្លាចំនួន០២កញ្ចប់ធំ ទម្ងន់ ២០៣,១៩ក្រាម (ថ្លឹងទាំងសំបក់ថង់), ជញ្ជីងថ្លឹងគ្រឿងញៀន០១ ព្រមទាំង សម្ភារៈច្រកនិងវេចខ្ចប់ថ្នាំញៀនមួយចំនួន។
បច្ចុប្បន្នជនសង្ស័យ និងវត្ថុតាងការិយាល័យជំនាញប្រឆាំងគ្រឿងញៀនកសាងសំណុំរឿងបញ្ជូនទៅអមសាលាដំបូងខេត្តតាកែវចាត់ការតាមនីតិវិធី៕ ដោយ៖ បងខន
