ខេត្តស្វាយរៀង ៖ បុរសម្នាក់មានវិបត្តិគ្រួសារ ដើរផឹកស្រាស្រវឹងរាល់ថ្ងៃ រហូតសរសៃប្រសាទគិតខ្លីព្យាយាមរត់ចូលឡានគេតាមផ្លូវជាតិលេខ១ ដើម្បីធ្វើអត្តឃាដជាច្រើនលើកច្រើនដងហើយ ពេលនេះត្រូវរងយន្តបុកស្លាប់បានសម្រេច ករណីគ្រោះថ្នាក់ចរាចរណ៍នេះកើតឡើងកាលពីវេលាម៉ោង៦និង៣៥នាទីយប់ នៅថ្ងៃទី០១ ខែមេសា នឆ្នាំ២០២១ នៅលើកំណាត់ផ្លូវជាតិលេខ១ នៅត្រង់ចន្លោះគីឡូម៉ែត្រ 111-112 (រវាងរថយន្ត និងអ្នកថ្មើជើង) ស្ថិតនៅភូមិព្រែកទប់ ឃុំស្វាយជ្រំ ស្រុកស្វាយជ្រំ ខេត្តស្វាយរៀង។ ជនរងគ្រោះឈ្មោះ តន់ ជុង ភេទប្រុស អាយុ38ឆ្នាំ រស់នៅ ភូមិត្រោក ឃុំតាសួស ស្រុកស្វាយជ្រំ ខេត្តស្វាយរៀង (ជាមនុស្សវិកលចារឹក)។
បើតាមសមត្ថកិច្ចបានឲ្យដឹងថា មុនពេលកើតហេតុគេឃើញជនរងគ្រោះដើរតាមដងផ្លូវ ហើយបានដើរឆ្លងផ្លូវក៏ត្រូវរថយន្ដមិនស្គាល់ម៉ាក បើកបរមកពីរទិសខាងកើត ទៅទិសខាងលិច បានបុកបណ្ដាលអោយស្លាប់នៅនឹងកន្លែងហេតុតែម្តង។
មូលហេតុៈជនរងគ្រោះដើរឆ្លងកាត់ផ្លូវ ក៏ប៉ុន្តែមហាជនដាក់ការសង្ស័យថា ជនរងគ្រោះរត់ចូលឡានគេធ្វើអត្តឃាដ ដោយប៉ុន្មានថ្ងៃកន្លងទៅនេះ ជនរងគ្រោះតែងតែព្យាយាមរត់ចូលរថយន្តគេតាមដងផ្លូវ តែត្រូវម្ចាស់រថយន្តបើកគេចផុតជាច្រើនលើកច្រើនសារមកហើយ ។ បច្ចុប្បន្នសាកសពត្រូវបានប្រគល់អោយក្រុមគ្រួសារ យកទៅធ្វើបុណ្យតាមប្រពៃណី៕
អត្ថបទនិងរូបភាព ដោយ: ខ្លាខ្មៅ
