បាត់ដំបង៖កាលពីថ្ងៃទី១៨ ខែមិនា ឆ្នាំ២០២១ កម្លាំងជំនាញនៃអធិការដ្ឋាននគរបាលក្រុងបាត់ដំបង បានទទួលពាក្យបណ្តឹងពីជនរងគ្រោះម្នាក់ឈ្មោះ ហឿម សុភ័ក្រ្ត ភេទស្រី អាយុ៤១ឆ្នាំ មានទីលំនៅក្នុងភូមិទួលតាឯក សង្កាត់ទួលតាឯក ក្រុងបាត់ដំបង បាត់ម៉ូតូ១គ្រឿងក្នុងបរិវេណសាលាបឋមសិក្សាជាសុីម ស្ថិតក្នុងសង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។
នៅវេលាម៉ោង២និង២០នាទីរសៀលថ្ងៃទី២១ ខែមិនា ឆ្នាំ២០២១ កម្លាំងនគរបាលជំនាញនៃអធិការដ្ឋាននគរបាលក្រុងបាត់ដំបង ចុះស្រាវជ្រាវនិងឃាត់ខ្លួនជនសង្ស័យម្នាក់ឈ្មោះ៖នាង រស្មី (ហៅមុី) ភេទប្រុស អាយុ៣៣ឆ្នាំ មុខរបរ (មិនពិតប្រាកដ) រស់នៅភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបង។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបងបានបញ្ជាក់ប្រាប់ក្រុមការងារTNNថា ក្រោយពេលឃាត់ខ្លួនជនសង្ស័យខាងលើដកហូតបានវត្ថុតាងរួមមាន៖ម៉ូតូSUZUKI VIVA ពណ៌ខ្មៅ សេរីឆ្នាំ២០១៧ ពាក់ស្លាកលេខ បាត់ដំបង1B-6072១គ្រឿង ដែកកាច់សោរចំនួន១ ថ្នាំសំរាប់បាញ់ប្តូរពណ៌ ចំនួន៣កំប៉ុង ថ្នាំញៀន១កញ្ចប់ និងសម្ភារៈប្រើប្រាស់ថ្នាំញៀនមួយចំនួនទៀត។
ប្រតិបត្តិការបង្ក្រាបនិងឃាត់ខ្លួនជនសង្ស័យគឺអនុវត្តន៍តាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង និងសម្របសម្រួលនិតិវិធីដោយលោកគឺ ប៉ុណ្ណារ៉ា ព្រះរាជអាជ្ញានៃអយ្យការអមសាលាដំបូងខេត្តបាត់ដំបង។
បច្ចុប្បន្នជនសង្ស័យរួមទាំងវត្ថុតាងត្រូវបានបញ្ជូនទៅស្នងការដ្ឋាននគរបាលខេត្តបាត់ដំបងដើម្បីចាត់ការបន្តតាមផ្លូវច្បាប់៕
ដោយ ៖ សុខ កុសល
