កំពង់ស្ពឺ ៖ យោងតាមផេក ស្នងការដ្ឋាននគរបាលខេត្តកំពង់ស្ពឺ បានបញ្ជាក់ថា នៅវេលាម៉ោង១១និង ០០នាទី កម្លាំងព្រហ្មទណ្ឌស្រុកសំរោងទង បានឃាត់ខ្លួនជនសង្ស័យឈ្មោះ ម៉ែន ណាត ភេទប្រុស អាយុ២៣ឆ្នាំ មុខរបរកម្មកររោងចក្រ រស់នៅភូមិផ្ចឹកជ្រុំ ឃុំពេជ្រមុន្នី ស្រុកគងពិសី ខេត្តកំពង់ស្ពឺ ពាក់ព័ន្ធករណីលួចយកម៉ូតូ ១គ្រឿង ម៉ាកហុងដា សេ១២៥ សេរីឆ្នាំ ២០២០ ពណ៍ខ្មៅ ពាក់ផ្លាកលេខ ភ្នំពេញ 1IA-2490 ជារបស់ឈ្មោះ ជឿន ចាន់សុខហេង ភេទប្រុស អាយុ២១ឆ្នាំ ស្នាក់នៅបន្ទប់ជួល ភូមិដូនកែវ ឃុំសែនដី ស្រុកសំរោងទង ខេត្តកំពង់ស្ពឺ ។
គួររំលឹក ផងដែរថា កាលពីថ្ងៃទី ៤ ខែមីនា ឆ្នាំ២០២១ វេលាម៉ោង ១៦ និង ០០នាទី នៅកន្លែងផ្ញើម៉ូតូក្នុងរោងចក្រ វេនធូរ៉ា ស្ថិតនៅភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ មានករណី បាត់ម៉ូតូមួយគ្រឿង ដោយមានការសង្ស័យ យុវជនម្នាក់ តាមរយៈកាមេរ៉ាសុវត្ថិភាពភាព ក្រោយពិនិត្យ និងស្រាវជ្រាវអស់រយៈពេលជាង១៥ម៉ោង សមត្ថកិច្ចកំណត់ មុខសញ្ញា សង្ស័យបាន និងឈានទៅធ្វើការឃាត់ខ្លួនរកឃើញវត្ថុតាងម៉ូតូមួយគ្រឿង ដែលជារបស់ជនរងគ្រោះ ។
តាមការបញ្ជាក់របស់សមត្ថកិច្ចជំនាញឱ្យដឹងថា ៖ ជនសង្ស័យបានយកម៉ូតូរបស់ខ្លួនទៅបញ្ចាំ និងគ្មានប្រាក់លស់យកមកវិញ ដោយខ្លាចម្ដាយស្ដីបន្ទោសខ្លួន បានរកវិធីលួចយកម៉ូតូ អ្នកដទៃដើម្បីយកទៅផ្ទះកុំអោយអាណាព្យាបាលដឹង ចៃដន្យ ពេលខ្លួនចេញមកក្បែររោងផ្ញើម៉ូតូ ស្រាប់តែឃើញម៉ូតូខាងលើទុកចោលមានសោរជាប់ស្រាប់ ខ្លួនបានធ្វើសកម្មភាពលួចយកតែម្ដង។
បច្ចុប្បន្នជនសង្ស័យ រួមជាមួយវត្ថុតាងម៉ូតូមួយគ្រឿង ត្រូវបានផ្នែកព្រហ្មទណ្ឌអធិការដ្ឋានកំពុងធ្វើការសាកសួរ និងបានកសាងសំណុំរឿងបញ្ជូនមកការិយាល័យជំនាញ ចាត់ការតាមនីតិវិធី៕
