បាត់ដំបង៖គ្រោះថ្នាក់ចរាចរណ៍រវាងរថយន្តនិងម៉ូតូបានកើតឡើង១លើកបណ្តាលអោយក្មេងប្រុសម្នាក់ស្លាប់មួយរំពេច។
ហេតុការណ៍នេះបានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី៥ ខែមិនា ឆ្នាំ២០២១ នៅតាមបណ្តោយផ្លូវជាតិលេខ៥ ចំណុចភូមិជ្រោយស្តៅ ឃុំជ្រោយស្តៅ ស្រុកថ្មគោល ខេត្តបាត់ដំបង។
ប្រភពព័ត៌មានពីសមត្ថកិច្ចបានអោយដឹងថា៖មុនពេលកើតហេតុមានរថយន្តម៉ាកLIHLANDER ពណ៌ខ្មៅ១គ្រឿង ពាក់ស្លាកលេខភ្នំពេញ 2AK-8278 បើកបរយ៉ាងលឿនក្នុងទិសដៅពីកើតទៅលិច លុះដល់ចំណុចកើតហេតុស្រាប់តែមានក្មេងប្រុសម្នាក់បានជិះម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ២០០៩ ពាក់ស្លាកលេខបាត់ដំបង 1E-1645 ឆ្លងផ្លូវត្រូវរថយន្តបុកពេញទំហឹងស្លាប់នៅនឹងកន្លែងកើតហេតុ។
ប្រភពព័ត៌មានបានបន្តថា៖ក្មេងប្រុសរងគ្រោះឈ្មោះ រិន ថាវរី ភេទប្រុស អាយុ១៣ឆ្នាំ រស់នៅភូមិជ្រោយស្តៅ ឃុំជ្រោយស្តៅ ស្រុកថ្មគោល ខេត្តបាត់ដំបង។
ក្រោយពេលកើតហេតុសមត្ថកិច្ចនគរបាលស្រុកថ្មគោលប្រគល់ករណីនេះអោយជំនាញចរាចរណ៍ផ្លូវគោកខេត្តបាត់ដំបងចាត់ការទៅតាមនិតិវិធី។
សូមបញ្ជាក់ថា៖ក្រោយពេលកើតហេតុភ្លាមៗនោះតៃកុងរថយន្ត(មិនស្គាល់អត្តសញ្ញាណ) បន្ថែមល្បឿនបើករហូតដល់ភូមិព្រះពន្លា ឃុំរូងជ្រៃ ទើបចតរថយន្តចោលរត់គេចខ្លួនបាត់៕
ដោយ ៖ សុខ កុសល
