ព្រឹតិ្តការណ៍ថ្មីៗ

ទីបំផុត! អនុញ្ញាត អាជីវករផ្សារព្រៃទារត្រឡប់ទៅផ្ទះវិញ បន្ទាប់ពីធ្វើកិច្ចសន្យាអប់រំ និងណែនាំនីតិវិធីច្បាប់ ក្រោយប្រើហិង្សា និងចាប់កោរសក់លើនារីជនសង្ស័យម្នាក់

2 ថ្ងៃ មុន 282 តូ សុផល

ភ្នំពេញ៖ នៅទីបំផុត ព្រះរាជអាជ្ញា បានសម្រេចអនុញ្ញាតឲ្យអាជីវផ្សារព្រៃទារចំនួន៤នាក់ ក្នុងនោះម្នាក់ជាសាក្សី ត្រឡប់ទៅផ្ទះវិញហើយ បន្ទាប់ពីធ្វើកិច្ចសន្យាអប់រំ និងពន្យល់ណែនាំអំពីនីតិវិធីច្បាប់ ក្រោយក្រុមអាជីវករបានប្រើអំពើហិង្សា និងចាប់កោរសក់ទៅលើនារីជាជនសង្ស័យម្នាក់ ដែលបានលួចទូរស័ព្ទនៅក្នុងផ្សារ។

សេចក្ដីរាយការណ៍ពីភ្នាក់ងារ បានឲ្យដឹងនៅព្រឹកថ្ងៃទី១៦ ខែកញ្ញា ឆ្នាំ២០១៨នេះថា បន្ទាប់ពីមានគោលការណ៍អនុញ្ញាតពីព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ នគរបាលខណ្ឌពោធិ៍សែនជ័យ បានឲ្យក្រុមអាជីវករផ្សារព្រៃទារចំនួន៤នាក់ ក្នុងនោះម្នាក់ជាសាក្សីបំភ្លឺ ត្រឡប់ទៅវិញ នៅវេលាម៉ោងប្រមាណ៥ល្ងាច ថ្ងៃទី១៥ ខែកញ្ញា ឆ្នាំ២០១៨ម្សិលមិញ។
ទន្ទឹមការឃាត់ខ្លួនអាជីវករ៤នាក់នេះ ក្រុមអាជីវផ្សារព្រៃទាជាច្រើននាក់ផ្សេងទៀត នៅថ្ងៃទី១៥ ខែកញ្ញាម្សិលមិញ ក៏បាននាំគ្នាតវ៉ាដើម្បីឲ្យមានការដោះលែង អាជីវករដូចគ្នាត្រឡប់ទៅផ្ទះវិញ ដោយលើកហេតុផលផ្សេងៗផងដែរ។

ជាមួយគ្នានេះ លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ ក៏បានអំពាវនាវដល់ប្រជាពលរដ្ឋទាំងអស់ ត្រូវបញ្ឈប់ការប្រើប្រាស់អំពើហិង្សា ទៅលើជនសង្ស័យ នៅពេលចាប់ខ្លួនបាន ពោលត្រូវបញ្ជូនទៅកម្លាំងនគរបាលមូលដ្ឋាន ដើម្បីចាត់ការបន្ដតាមនីតិវិធី ព្រោះថាពេលខ្លះការប្រើប្រាស់អាចបណ្ដាលឲ្យជនល្មើសស្លាប់ ឬពេលខ្លះជននោះ សមត្ថកិច្ចមិនទាន់កំណត់រកឃើញបទល្មើសនៅឡើយទេ។

សូមជម្រាបថា អាជីវករផ្សារព្រៃទាចំនួន៤នាក់ ត្រូវបានកម្លាំងនគរបាល ហៅមកសួរនាំនៅអធិការដ្ឋាននគរបាលខណ្ឌពោធិ៍សែនជ័យ ក្រោយពាក់ព័ន្ធចាប់ស្ដ្រីជនសង្ស័យជាចោរលួចម្នាក់ កោរសក់ និងធ្វើទារុណកម្មលើរូបរាងកាយ កាលពីថ្ងៃទី១៣ ខែកញ្ញា ឆ្នាំ២០១៨។
បន្ទាប់មកវីដេអូនៃការចាប់កោរសក់ និងប្រើប្រាស់ហិង្សា ត្រូវបានចែកចាយពេញបណ្ដាញសង្គម Facebook ធ្វើឲ្យមហាជនខ្លះរិះគន់ចំពោះសកម្មភាពនេះផងដែរ ដោយបញ្ចេញមតិថា មិនត្រូវប្រើហិង្សានោះទេ គឺត្រូវចាប់បញ្ជូនទៅសមត្ថកិច្ច ដើម្បីផ្ដន្ទាទោសតាមច្បាប់៕

បន្ថែមយោបល់របស់អ្នក

យោបល់

 

 

ព័ត៌មានពាក់ព័ន្ធ