ព្រឹតិ្តការណ៍ថ្មីៗ

ទីបំផុត បុរសខ្លាំងវ័យក្មេង គីម ជុងអ៊ុន ទៅដល់សិង្ហបុរីហើយ ដើម្បីត្រៀមបើកកិច្ចប្រជុំកំពូលជាមួយបុរសខ្លាំងវ័យចំណាស់ ដូណាល់ ត្រាំ​ នៅ​ថ្ងៃ​អង្គារ

2 សប្តាហ៍ មុន 312 តូ សុផល

សិង្ហបុរី៖ ទីបំផុតប្រមុខដឹកនាំកូរ៉េខាងជើង លោក គីម ជុងអ៊ុន បានទៅដល់ប្រទេសសិង្ហបុរីហើយនាថ្ងៃអាទិត្យនេះ ពោលគឺនៅ០២ថ្ងៃ​មុន​​ការបើកជំនួបកំពូលជាមួយប្រធានាធិបតីអាមេរិក លោក ដូណាល់ ត្រាំ នៅទីនោះ។ នេះបើតាមការដកស្រង់ការផ្សាយចេញពីសារព័ត៌មាន​ Channel News Asia នៅរសៀលថ្ងៃអាទិត្យ ទី១០ ខែមិថុនា ឆ្នាំ២០១៨។

លោក គីម ជុងអ៊ុន និងលោក ដូណាល់ ត្រាំ នឹងត្រូវបើកកិច្ចប្រជុំកំពូលជាប្រវត្តិសាស្រ្ត នៅឯសណ្ឋាគារ Capella លើកោះ Sentosa របស់​ប្រទេសសិង្ហបុរី ដើម្បីជជែកអំពីការរំសាយអាវុធនុយក្លេអ៊ែរ​របស់កូរ៉េខាងជើង ជាថ្នូរនឹងការសម្បទានសេដ្ឋកិច្ច ព្រមទាំងការធានាសន្តិសុខ​​​ពីសហរដ្ឋអាមេរិក។ ខណៈដែលលោក គីម ជុងអ៊ុន បានទៅដល់ដីសិង្ហបុរីហើយនោះ លោក ដូណាល់ ត្រាំ កំពុងនៅតាមផ្លូវលើយន្តហោះ Air Force ចេញពីកាណាដា ឆ្ពោះមកកាន់សិង្ហបុរីនៅឡើយទេ ប៉ុន្តែលោកត្រូវគេរំពឹងថានឹងមកដល់នៅថ្ងៃអាទិត្យនេះដូចគ្នា។

​លោក គីម ត្រូវគេរំពឹងថានឹងស្នាក់នៅសណ្ឋាគារ St Regis ខណៈលោក ត្រាំ នៅសណ្ឋាគារ Shangri-La ដោយសណ្ឋាគារ​ទាំងពីរស្ថិតនៅតំបន់ Tanglin ដែលជាទីប្រជុំជនដ៏ធំរបស់សិង្ហបុរី ហើយទាំងកោះ Sentosa និងតំបន់ Tanglin សុទ្ធតែត្រូវបានចាត់ថ្នាក់​ជា​​ទីតាំងសម្រាប់រៀបចំព្រឹត្តិការណ៍ពិសេសដោយអាជ្ញាធរសិង្ហបុរី ខណៈសន្តិសុខត្រូវបានរឹតបន្តឹងជាខ្លាំង នៅជុំវិញតំបន់ទាំងពីរ​កន្លែង​នេះ​។​

គួរជម្រាបថា ​នៅមុនកិច្ចប្រជុំកំពូលកូរ៉េខាជើង-អាមេរិក នាយករដ្ឋមន្រ្តីសិង្ហបុរី លោក Lee Hsien Loong ក៏នឹងទទួលជួបលោក គីម ជុងអ៊ុន នៅ​ថ្ងៃអាទិត្យផងដែរ ខណៈសម្រាប់លោក ត្រាំ លោក Lee នឹងជួបនៅថ្ងៃចន្ទស្អែក ៕

បន្ថែមយោបល់របស់អ្នក

យោបល់

 

 

ព័ត៌មានពាក់ព័ន្ធ